NDI-ის კვლევის პოლიტიკური ნაწილი დღეს გამოქვეყნდა, რომლის მიხედვითაც, ხვალ რომ არჩევნები ტარდებოდეს, ქართული ოცნებას - 17, ხოლო ნაციონალურ მოძრაობას 13% მისცემდა ხმას.

ნაციონალური მოძრაობის სიის პირველი ათეულის ერთ-ერთი წევრი ოთო კახიძე On.ge-სთან საუბრისას აცხადებს, რომ კვლევის შედეგებს ენდობა, თუმცა ის სრულ სურათს არ აჩვენებს. არჩევნებში კი ნაციონალური მოძრაობა გაიმარჯვებს, რადგან ის ერთადერთი პარტიაა, რომელიც შეძლებს ხელისუფლების შეცვლას და ქვეყანას სტაგნაციიდან გამოიყვანს.

"NDI-ის კვლევის ამ და სხვა ნაწილს ვენდობი, რადგან ეს არის ავტორიტეტული ორგანიზაციის დაკვეთით ჩატარებული კვლევა. სოციოლოგიასაც ვაღიარებ, როგორც მეცნიერებას".

On.ge-ს კითხვაზე, თუ როგორ შეეცდება ერთიანი ნაციონალური მოძრაობა გადაუწყვეტელი ამომრჩევლის ხმების მოზიდვას, რომელიც 57%-ს შეადგენს, კახიძემ უპასუხა, რომ პარტიას აქვს დროში გაწერილი გეგმა, თუ როგორ უნდა გამოვიდეს ქვეყანა კრიზისიდან:

"ეს კვლევაშიც ჩანს, რომ მოსახლეობის მხოლოდ 25% თვლის, რომ სწორი მიმართულებით ვითარდება ქვეყანა. გაზრდილია სიღარიბე და უმუშევრობის მაჩვენებელი, ნაციონალური მოძრაობის პროგრამა და გეგმა კი არის პასუხი ყველა აღნიშნულ პრობლემაზე".

ხელისუფლების რესურსი არის მხოლოდ ის 25-27 პროცენტი, რომელიც თვლის, რომ ქვეყანა ვითარდება სწორი მიმართულებით და რომლებიც ამბობენ, რომ არასდროს მისცემენ ხმას ნაციონალურ მოძრაობას

ოთო კახიძე

კახიძე მიიჩნევს, რომ ქართულ ოცნებას არც გეგმა აქვს და არც გზავნილი მოსახლეობისკენ, რას გააკეთებენ არჩევნებში გამარჯვების შემთხვევაში:

"ისინი ცინიკურად იმეორებენ, რომ ყველა დაპირება შეასრულეს და ყველაფერი კარგადაა. მათი შეცვლის ერთადერთი ალტერნატივა ამ არჩევნებში არის ნაციონალური მოძრაობა და ეს კვლევაშიც კარგად ჩანს".

ოთო კახიძე მიიჩნევს, რომ NDI-ს კვლევის შედეგების ცვლილება არჩევნებზე ბუნებრივია, რადგან ამომრჩევლის 57%-ს არ გადაუწყვეტია, ვის მისცემდა ხმას და კვლევაში თავისი არჩევანი არ დაუფიქსირებია:

"ჩვენი მოლოდინები ცალსახაა, ერთიანი ნაციონალური მოძრაობა არჩევნებში გაიმარჯვებს და პარლამენტში უმრავლესობით მოვა. ესაა მარტივი კალკულაციის შედეგი. ის მაჟორიტარული არჩევნების მეორე ტურებს მოიგებს უმრავლეს ოლქებში".

კახიძე მიიჩნევს, რომ რადგან კვლევა არ აჩვენებს, ვისი მომხრე შეიძლება იყოს გადაუწყვეტელი ამომრჩეველი ან ის, ვისაც კითხვაზე პასუხის გაცემა არ სურს, საზოგადოება სრულ სურათს არჩევნების შემდეგ მიიღებს:

"ჩემი აზრით, ხელისუფლების რესურსი არის მხოლოდ ის 25-27 პროცენტი, რომელიც თვლის, რომ ქვეყანა ვითარდება სწორი მიმართულებით და რომლებიც ამბობენ, რომ არასდროს მისცემენ ხმას ნაციონალურ მოძრაობას".

კახიძის თქმით, ნაციონალური მოძრაობა საარჩევნო კამპანიის რეჟიმშია და მოქალაქეებამდე საკუთარი პროგრამა როგორც მაჟორიტარების, ისე ყველა "ხელთარსებული საშუალებით" მიაქვთ.

NDI-ის გამოკითხვა 2016 წლის 8 ივნისიდან 6 ივლისის პერიოდში, საქართველოს მასშტაბით 4 113 პირისპირ ინტერვიუს წარმომადგენლობითი შერჩევის საფუძველზე, ქვეყნის ქართულენოვან, სომხურენოვან და აზერბაიჯანულენოვან მოსახლეობას შორის ჩატარდა. კვლევაში საშუალო ცდომილების ზღვარი არის +/- 2,1%.

კვლევას აფინანსებს შვედეთის საერთაშორისო თანამშრომლობის განვითარების სააგენტო (SIDA) და ატარებს CRRC-საქართველო.