ფილიპინებში ქალაქ ჯენერალ ტინიოს მერი ფერდინანდ ბოტე ცეცხლსასროლი იარაღით ბაიკერმა მოკლა. ფილიპინებში მერის მკვლელობის ეს უკვე მეორე შემთხვევაა, წერს CNN.

ფერდინანდ ბოტე საავადმყოფოში მიყვანისთანავე გარდაიცვალა. როგორც ფილიპინების პრეზიდენტის პრესსპიკერი ამბობს, ისინი ძალისხმევას არ დაიშურებენ, რათა მკვლელობები გამოიძიონ.

წინა დღეს, 3 ივლისს ქალაქ ტანაუანის მერი, ანტონიო ჰალილი დღისით ერთ-ერთ ღონისძიებაზე სნაიპერმა მოკლა.

CNN წერს, რომ ჰალილი, რომლის გარშემოც აზრთა სხვადასხვაობა არსებობდა, პრეზიდენტ როდრიგო დუტერტეს მოკავშირე იყო. მან სახელი ნარკოდამნაშავეების საჯაროდ შერცხვენით გაითქვა. ასევე, წერდნენ, რომ ჰალილი თვითონ მფარველობდა ნარკოდამნაშავეებს, რასაც მერი უარყოფდა.

ჯერჯერობით უცნობია არის თუ არა კავშირი ამ მკვლელობებს შორის.