ბათუმის დელფინარიუმში ერთი კვირის შუალედში, სხვადასხვა აუზში ორი დელფინი დაიბადა. კადრებზე სწორედ ერთ-ერთი მათგანის დაბადებაა აღბეჭდილი.

მშობიარობის მოლოდინში, თანამშროლები სრულ მზადყოფნაში იყვნენ, დედა დელფინი კი დაკვირვების ქვეშ იყო. ვიდეო ბათუმის დელფინარიუმის ერთ-ერთმა მწვრთნელმა გადაიღო.

"დილით ჩვეულებისამებრ შემოვლაზე ვიყავით, აუზები დავათვალიერეთ, ბინადრები მოვინახულეთ, ღამის მომვლელისგან ბოლო ინფორმაცია მივიღეთ. დავინახე როგორ გაიზნიქა ციცი რამდენჯერმე, მივხვდი, რომ მშობიარობა დაეწყო. დაბადების პროცესი საათზე მეტხანს გაგრძელდა. როცა პატარა დავინახე, სიხარულისაგან ცრემლები ვერ შევიკავე", - ამბობს ის.

ვიდეოში ჩანს, რომ დაბადებიდან რამდენიმე წამში, დედა დელფინმა შვილი წყლის ზედაპირზე ჰაერის პირველი ჩასუნთქვისათვის ამოაცურა, რის შემდეგაც პატარამ აუზში ცურვა დაიწყო.

ახალშობილი დელფინი დედასთან ერთად უკვე შოუს აუზში იმყოფება.

ფოტო: ბათუმის დელფინარიუმი

კიდევ ერთი ჯანმრთელი დელფინი 20 ივნისს დაიბადა. მისი დედა ფლიპერია.

"მან ყურადღება და პატარაზე ზრუნვა დაბადებიდან პირველივე წამებში დაიწყო. დედა-შვილი თავს შესანიშნავად გრძნობს. ამჟამად ფლიპერი პატარას უკვე ასწავლის წყალზე ტივტივსა და ღრმად ჩაყვინთვას, კვებავს საკუთარი რძით, ხოლო დელფინთა მთელი ოჯახი მხარს უჭერს და ეხმარება ახალგაზრდა დედას", - ვკითხულობთ დელფინარიუმის ვებგვერდზე.

ახალშობილი დელფინების სახელების შესარჩევი კონკურსი მათი სქესის დადგენის შემდეგ გამოცხადდება. ნებისმიერი მსურველი შეძლებს საკუთარი ვერსიის გაგზავნას დელფინარიუმის ვებ-გვერდზე. გამარჯვებულები ბათუმობის დღესასწაულზე გამოვლინდებიან.