დღეს ლინჩის ფანებისთვის ისტორიული დღეა, რადგან პირველი შემთხვევაა, რაც დევიდ ლინჩმა საჯაროდ ახსნა საკუთარი სიტყვები, რომლებიც არასწორად გაიგეს.

ისტორიული დღეა ამერიკის პრეზიდენტისთვის, რადგან სწორედ დონალდ ტრამპია ის ადამიანი, რომელსაც პატივი ერგო, ლეგენდარული დევიდ ლინჩისგან მისივე სიტყვების განმარტება მოესმინა.

რამდენიმე დღეს წინ, გარდიანმა ლინჩის ახალ წიგნთან დაკავშირებით, ამერიკელ რეჟისორთან, მწერალთან და კომპოზიტორთან ინტერვიუ ჩაწერა. მასში ლინჩი საუბრობს ურთიერთობებზე, შემოქმედებასა და ხედვაზე. თუმცა გრძელი ინტერვიუს ერთი ნაწილი ამერიკისა და შესაბამისად, მსოფლიოს პოლიტიკურ ცხოვრებასაც ეხება.

ლინჩი ამბობს, რომ დონალდ ტრამპი ამერიკის ისტორიაში ერთ-ერთ საუკეთესო პრეზიდენტად შევა, რადგან მან ეს ინსტიტუტი სრულიად გაანადგურა:

"დონალდ ტრამპს შეუძლია ისტორიაში შევიდეს, როგორც ერთ-ერთი ყველაზე დიდებული პრეზიდენტი, რადგან მან ეს ინსტიტუტი თითქმის გაანადგურა. არავის შეუძლია ინტელექტუალურად დაუპირისპირდეს, რადგან მასთან ჭკვიანურად საუბარი შეუძლებელია. ჩვენს ეგრეთ წოდებულ ლიდერებს არ შეუძლიათ ქვეყნის წინ წაყვანა და საქმის ბოლომდე მიყვანა. ბავშვებივით არიან. ტრამპი კი, ამისი მაგალითია".

მისი ამ ციტატის სწორად გაგება შესაძლოა გაუჭირდეს მას, ვინც ლინჩის შემოქმედებაზე ბევრი არაფერი იცის, ან უბრალოდ იმ სტატიის მხოლოდ სათაურს კითხულობს, რომელიც სავარაუდოდ ასე ჰქვია: "დევიდ ლინჩი: დონალდ ტრამპს შეუძლია ისტორიაში შევიდეს როგორც ერთ-ერთი ყველაზე დიდებული პრეზიდენტი".

როგორც აღმოჩნდა, დონალდ ტრამპმა, ან მისი ადმინისტრაციის თანამშრომელმა, რომელიც ტრამპის წერის მანერას ითვისებს, რომ მკითხველმა მისი და პრეზიდენტის ნაწერი ვერ გაარჩიოს, სტატიის მხოლოდ სათაური წაიკითხა.

რის შემდეგაც პრეზიდენტის საყვარელ სოციალურ მედიაზე ამაყი ტვიტი გამოჩნდა.

თუმცა მოგვიანებით მან ფაქტიურად საკუთარი შეცდომა აღიარა, როდესაც მხარდამჭერებთან გამოსვლისას ლინჩის ციტატის გაგრძელება ხმამაღლა წაიკითხა და რეჟისორზე ისიც კი თქვა, რომ ჰოლივუდში შეიძლება კარიერის დასრულებაც მოუწიოს მისი "მხარდაჭერის" გამო:

"ის ამბობს, რომ ისტორიაში ყველაზე დიდებულ პრეზიდენტად შევალ და ამით ჰოლივუდში თავის კარიერასაც ასრულებს. ვეტერან რეჟისორს ახლა სჯერა, რომ ისტორიაში დიდებულად შევალ, რადგან პოლიტიკური ხედვა შეიცვალა. ის დემოკრატია, ანუ ხმა ობამას მისცა. ის ბერნი სანდერსის ამომრჩეველია, მაგრამ ახლა ფიქრობს, რომ მე ყველაზე დიდებულ პრეზიდენტად შევალ ისტორიაში, რადგან, მისი აზრით, ამ ინსტიტუტს ძირი გამოვუთხარე და ჩემთან გონივრული კამათი შეუძლებელია".

სწორედ ამ ისტორიის შემდეგ გამოეხმაურა დევიდ ლინჩი დონალდ ტრამპს ღია წერილით:

"ძვირფასო ბატონო პრეზიდენტო,

დევიდ ლინჩი გწერთ. ვნახე, რომ ბრეიტბარტის სტატია გადატვიტეთ, რომლის სათაურიც იყო: "დევიდ ლინჩი: დონალდ ტრამპს შეუძლია ისტორიაში შევიდეს როგორც ერთ-ერთი ყველაზე დიდებული პრეზიდენტი". ვისურვებდი ერთად დავმსხდარიყავით და გვესაუბრა. ეს ციტატა, რომელმაც მსოფლიო მოიარა, კონტექსტიდან იყო ამოვარდნილი და ახსნა სჭირდება.

სამწუხაროდ, თუ ისე განაგრძობთ, როგორც აქამდე მოქმედებდით, შანსი არ გექნებათ, რომ ისტორიაში საუკეთესო პრეზიდენტად შეხვიდეთ. ეს სამწუხარო იქნება თქვენთვის და ასევე ქვეყნისთვის. თქვენ ტანჯვა და განშორება გამოიწვიეთ.

თუმცა, გემის შემობრუნება ძალიან დაგვიანებული არაა. ყველასთვის მივმართოთ ჩვენი გემი ნათელი მომავლისკენ. თქვენ შეგიძლიათ გააერთიანოთ ქვეყანა. თქვენი სული სიმღერას დაიწყებს. დიდებული და მზრუნველი ლიდერობის ქვეშ, არავინ წააგებს, ყველა მოიგებს. ეს ისეთი რამაა, რაზეც იმედი მაქვს გიფიქრია და გულსაც მიუძღვნი. რაც შენ ყველაზე მეტად გჭირდება ისაა, რომ ადამიანებს ისევე მოექცე, როგორც შენ ითხოვ, რომ მოგეპყრან.

პატივისცემით

დევიდ ლინჩი".

ჩვენ არ გვახსენდება ასეთი ჰუმანური მიდგომა დონალდ ტრამპის მიმართ, თქვენ? ახლა ყველაფერი ამერიკის შეერთებული შტატების პრეზიდენტის ხელშია და ის აჩვენებს მსოფლიოს, იმსახურებდა თუ არა დევიდ ლინჩისგან წერილს, რომელიც ისტორიაში შევა, როგორც ერთ-ერთი საუკეთესო რჩევა და ღია წერილი დონალდ ტრამპის მისამართით.