დე ფაქტო აფხაზეთის რესპუბლიკის საგარეო უწყება ოთხოზორია-ტატუნაშვილის სიის შექმნას ეხმიანება და აცხადებს, რომ საქართველოს ხელისუფლება დესტრუქციულ ნაბიჯებს დგამს. დე ფაქტო უწყების განცხადებით, კიდევ ერთხელ გამოჩნდა საქართველოს აგრესიული პოლიტიკა აფხაზეთთან და მის მოქალაქეებთან მიმართებაში.

"ფაქტობრივად, ქართულმა მხარემ ყოველგვარი ობიექტური საფუძვლების გარეშე დასდო ბრალი ადამიანის უფლებების დარღვევაში აფხაზეთის და ოსეთის მოქალაქეებს და ისინი შავ სიაში შეიყვანა", - ვკითხულობთ განცხადებაში.

განცხადებაში ხაზგასმულია, რომ პრემიერ-მინისტრი მამუკა ბახტაძე პროვოკაციულად საუბრობს, რაც ჟენევის მოლაპარაკებების შედეგებს საფრთხის ქვეშ აყენებს. მათი თქმით, მოლაპარაკებების შესაძლო ჩაშლაში სრულ პასუხისმგებლობას პირადად მამუკა ბახტაძეს აკისრებენ. მათივე თქმით, ყურადღებით მიადევნებენ თვალს პრემიერის გადაწყვეტილებებს, რომელიც პირდაპირ ეხება აფხაზეთის რესპუბლიკის მოქალაქეებს.

ოკუპირებულ ტერიტორიებზე საქართველოს მოქალაქეების წინააღმდეგ ჩადენილი დანაშაულისთვის ოთხოზორია-ტატუნაშვილის სიაში 33 პირი მოხვდა. პრემიერ-მინისტრ მამუკა ბახტაძის თქმით, სიაში შემავალი პირების მიმართ ყველა შესაძლო შეზღუდვის დასაწესებლად, მთავრობამ ის ღონისძიებები განსაზღვრა, რომლებიც საერთაშორისო ორგანიზაციებმა და პარტნიორებმა უნდა გაატარონ.