მწერალი ზურა აბაშიძის ჰომოფობიურ ნიადაგზე ცემის საქმეზე შსს-მ გამოძიება დაიწყო. როგორც შსს-ში On.ge-ს უთხრეს, გამოძიება სისხლის სამართლის კოდექსის 126-ე მუხლით მიმდინარეობს, რაც ძალადობას გულისხმობს.

ზურა აბაშიძემ ფეისბუქზე დაწერა, რომ 21 ივნისს საღამოს მას უცნობი პირი თავს დაესხა და ჰომოფობიური ნიადაგზე ფიზიკური და სიტყვიერი შეურაცხყოფა მიაყენა.

გარდა ამისა, აბაშიძე წერს, რომ პოლიცია ცდილობდა, რომ მისთვის გადაეფიქრებინა განცხადების დაწერა.

"საბოლოოდ მაინც დავწერე, მერე დავჯექი დაკითხვაზე, რაღაცებს აკაკუნებდა სხვა თანამშრომელი კომპიუტერზე და აპირებდა დაეწერა,რომ თითქოს ჩემთვის უცნობია, რა მოტივით დამესხა თავს უცხო პიროვნება, ერთი ოცჯერ გავუმეორე, რომ უცნობი არ არის, ჰომოფობიის ნიადაგი ჰქვია მაგას, მეძახდა კიდეც პიდარასტს-თქო, სანამ არ ვიჩხუბე და მივუვარდი მეგობრებს დასახმარებლად, რომლებიც იქვე მელოდებოდნენ, ვერ გავაგებინე, თან აქეთ მომიბრუნდა, რა იყო, ამხელა კაცი ხარ, შენი აზრი არ გაგაჩნია, რას დარბიხარ მეგობრებთანო. ცოტა მოგვიანებით, ერთ-ერთმა თანამშრომელმა ფოტოს გადაღებაში შენიშნა ჩემი მეგობარი და ორივე გაყარა გაფრთხილების გარეშე. და ყველაფერი დაგვირგვინდა დამკითხველის კითხვით, ვერ უთხარი თავდამსხმელს, ტრანსი არ ვარ, ნორმალური ვარო", - წერს აბაშიძე ფეისბუქზე.

როგორც შსს აცხადებს, გავრცელებული პოსტის საფუძველზე უწყების ადამიანის უფლებათა დაცვის დეპარტამენტმა ზურა აბაშიძე და მისი მეგობრები გასაუბრებისთვის სამინისტროში დაიბარა.

ამავე დროს, პოლიციის მხრიდან უფლებამოსილების შესაძლო გადამეტების გამოსაძიებლად გენერალურმა ინსპექციამ აღნიშნული საქმის შესწავლა დაიწყო.