სააპელაციო სასამართლოს გადაწყვეტილების გასაპროტესტებლად, რომელმაც პრეზერვატივების შეფუთვა უხამს რეკლამად მიიჩნია, აიისა საპროტესტო აქციას გამართავს. აქციაზე გაიყიდება პრეზერვატივები კონკრეტული დიზაინით. შეგროვილი თანხით კი, საზოგადოებრივი პროტესტის ნიშნად, სასამართლოს მიერ დაკისრებულ ჯარიმას გადაიხდიან.

"ცენზურის ამ ნათელ მაგალითს გვინდა შეუზღუდავი საზოგადოებრივი გამოხატვის თავისუფლება დავუპირისპიროთ. იმ სანქციებს რაც დაგვეკისრა (500 ლარის გადახდა და დიზაინების - ძლევაი საკვირველი, სამეფო კარი თამარში, 2 თითი, პანდა, გაყიდვიდან ამოღება) გაყიდვის ალტერნატიული ფორმა მოვუძებნეთ ახალი პლატფორმის #გაბანტე-ს ფარგლებში."

კომპანია მხარდამჭერებს აძლევს საშუალებას თავად შექმნან სასამართლოს მიერ აკრძალული ან სხვა სახის დიზაინი და გამოხატონ თავისუფლება მათი ფანტაზიით. აიისას განცხადებით, ცენზურას საზოგადოებრივი გამოხატვის თავისუფლება უნდა დაუპირისპირდებს.

თბილისის სააპელაციო სასამართლომ ძალაში დატოვა აიისას საქმეზე პირველი ინსტანციის, თბილისის საქალაქო სასამართლოს გადაწყვეტილება, რომლის თანახმადაც აიისას შეფუთვა მართლმადიდებელი ეკლესიის მრევლის რელიგიურ გრძნობებს ლახავს. კომპანია 500 ლარით დაჯარიმდა და პროდუქციის გაყიდვიდან ამოღება დაეკისრა.

სასამართლომ საკითხის განხილვა მას შემდეგ დაიწყო, რაც თბილისის მერიამ ადმინისტრაციულ სამართალდარღვევათა ოქმი გაუგზავნა მოქალაქეთა პოლიტიკური გაერთიანების, ქართული იდეის მოთხოვნის საფუძველზე.