პროკურატურამ საგანგებო ბრიფინგი გამართა, რომელზეც განაცხადა, რომ 2012 წლის პირველ ოქტომბრამდე გამოტანილი გამამტყუნებელი განაჩენების გადასინჯვას იწყებს. უწყების წარმომადგენლის თქმით, ამ ეტაპზე საქართველოს 3 მოქალაქის, იოსებ ჯანდიერის, თემურ სალაყაიას და ანდრო ჩხიკვიშვილის განაჩენები გადაისინჯება.

უწყება ამბობს, რომ აღნიშნული პირები იხდიდნენ სასჯელს წინა ხელისუფლებისათვის მიუღებელი პოლიტიკური შეხედულებებისა და მათი უკანონო ბრძანებების შეუსრულებლობის გამო. კერძოდ:

• იოსებ ჯანდიერის მიმართ სისხლისსამართლებრივი დევნა მხოლოდ იმიტომ დაიწყო, რომ მან 2007 წლის ნოემბრის აქციების დროს დემონსტრაციულად დატოვა ენმ, სადაც ის პარტიის საგანგებო სიტუაციების სწრაფი რეაგირების უფროსის თანამდებობაზე 2003 წლიდან მუშაობდა, შეურთდა აქციას და დახია პარტიის მოწმობა. ამის შემდეგ მას საცხოვრებელ სახლში ჰეროინი ჩაუდეს, რის შემდეგაც ის დააკავეს. მას თავისუფლების აღკვეთა 8 წლით მიესაჯა, თუმცა 2008 წელს პრეზიდენტის შეწყალების შედეგად, ისე, რომ მას ეს არ მოუთხოვია, ჯანდიერმა დატოვა საპატიმრო დაწესებულება.
• თემურ სალაყაია შსს-ს კონსტიტუციური დეპარტამენტის ყოფილი თანამშრომელია, რომელიც დააკავეს იმიტომ, რომ ის დაკავშირებული იყო ქართულ ოცნებასთან. 2012 წელს ის გამოიძახეს სამსახურიდან თბილისში, ჭანტურიას ქუჩაზე და კუდის და ძველი თბილისის პოლიციის თანამშრომლების ერთობლივი მოქმედებით, ის ჰეროინის უკანონო შენახვის ცრუ ბრალდებით დააკავეს. ის ციხიდან მხოლოდ ხელისუფლების ცვლილების შემდეგ გაუშვეს.
• ანდრო ჩხიკვიშვილი იყო შვეიცარული კომპანიის წარმომადგენელი საქართველოში, რომელის მიმართაც ენერგეტიკის სამინისტროს გააჩნდა დავალიანება. მან ყალბი ექსპერტიზის დასკვნის საფუძველზე 5 წლიანი სასჯელი მოიხადა ციხეში. 2006 წელს ის დაიბარეს გენერალურ პროკურატურაში და მოსთხოვეს შვეიცარული კომპანიის წარმომადგენლების დარწმუნება იმაში, რომ აღარ მოეთხოვათ ქართული მხარისგან მისაღები თანხა. ჩხიკვიშვილმა აღნიშნულზე უარი განაცხადა, რის შედეგადაც ის თაღლითობის ბრალდებით დააკავეს, რასაც საფუძვლად ექსპერტიზის ბიუროს ყალბი დასკვნა დაედო.

პროკურატურა ამბობს, რომ ამ გადაწყვეტილების მიღებამდე აღნიშნულ საქმეებზე ჩატარდა ხელახალი სრულყოფილი და ობიექტური გამოძიება, დაიკითხნენ ახალი მოწმეები, ჩატარდა ათეულობით საგამოძიებო და საპროცესო მოქმედება, შეისწავლეს საგამოძიებო საქმის მასალები, მოიპოვეს ახალი მტკიცებულებები და ფაქტები, რის საფუძველზეც გამოიძიებამ თითოეულ ამ საქმეში მოიპოვა უტყუარ მტკიცებულებათა ერთობლიობა, რომლითაც გამოირიცხა ხსენებული პირების მიერ იმ დანაშაულის ჩადენა, რისთვისაც ისინი მსჯავრდებულნი არიან.