სამართლიანი არჩევნების ანგარიშის მიხედვით, ერთიანი ნაციონალური მოძრაობის წარმომადგენელი აჭარაში, ლევან ვარშალომიძე, ამომრჩევლებთან საარჩევნო დაპირებას ინდივიდუალური ხელშეკრულებების ფორმით აფორმებს. ამის შესახებ წერია ორგანიზაციის წინასაარჩევნო პერიოდის მონიტორინგის შუალედურ ანგარიშში, რომელიც დღეს გამოქვეყნდა.

სამართლიანი არჩევნებისა და დემოკრატიის საერთაშორისო საზოგადოება აღნიშნავს, რომ ეს ქმედება ამომრჩევლის ნებაზე ზემოქმედების ნეგატიურ ფორმას წარმოადგენს, ვინაიდან ამომრჩეველმა შესაძლოა აღნიშნულ ხელშეკრულებაზე ხელმოწერა არა ნების დაფიქსირებად, არამედ მომავალში უფლების წარმოშობის სავალდებულო წინაპირობად აღიქვას.

სამართლიანი არჩევნებისა და დემოკრატიის საერთაშორისო საზოგადოებამ (შემდგომში სამართლიანი არჩევნები) შეერთებულ შტატების საერთაშორისო განვითარების სააგენტოს (USAID) და ეროვნული წვლილი დემოკრატიისთვის (NED) ფინანსური მხარდაჭერით წინასაარჩევნო პერიოდის მონიტორინგი 2016 წლის 1 ივლისიდან დაიწყო.

ანგარიში მოიცავს 2016 წლის 1 ივლისიდან 18 ივლისის ჩათვლით პერიოდს, აგრეთვე მოვლენებს, რომელთა განვითარება 1 ივლისამდე დაიწყო და მონიტორინგის პერიოდშიც მიმდინარეობდა.