არასამთავრობო ორგანიზაციები 8 აპრილს აფრიკელი სტუდენტების მიმართ, სავარაუდო რასობრივი შეუწყნარებლობის მოტივით ჩადენილი ძალადობის ფაქტს განცხადებით ეხმაურებიან.

არასამთავრობოების განცხადებით, ჩნდება კითხვები, თუ რამდენად მიუკერძოებლად მიმდინარეობს გამოძიება, სამართალდამცავი ორგანოები რამდენად ისახავენ მიზნად საქმეზე ობიექტური ჭეშმარიტების დადგენას, ხომ არა აქვს ადგილი იმის მცდელობას, რომ მოხდეს სამართლებრივი საკითხების არაფორმალური მოწესრიგება და დანაშაულის სავარაუდო ჩამდენი პირების პასუხისმგებლობისაგან არიდება.

განცხადებაში ვკითხულობთ, რომ მედიაში გავრცელებულ ინფორმაციასა და ვიდეოებზე დაყრდნობით, მოძალადეები შეიარაღებულები იყვნენ ხელკეტებით და ცივი იარაღით, დაზარალებულების მიმართ იყენებდნენ სიძულვილის ენას.

"იგივე დასტურდება სტუდენტების მიერ პოლიციისათვის მიცემულ განმარტებებში, რაც ადასტურებს, დანაშაულის ჩადენის დისკრიმინაციულ მოტივს", - ნათქვამია არასამთავრობოების განცხადებაში.

არასამთავრობოების განცხადებით, გამოძიებას საქმისთვის რასობრივი დისკრიმინაციის კვალიფიკაცია არ მიუნიჭებია. ჩატარებულია რამდენიმე საგამოძიებო მოქმედება, თუმცა, დანაშაულის ჩამდენ სავარაუდო პირებს პასუხისმგებლობა ამ დრომდე არ დაკისრებიათ.

არასამთავრობო ორგანიზაციები საუბრობდნენ პოლიციის თანამშრომლების გულგრილობისა და გამოვლენილი რასისტული ძალადობის მიმართ ლოიალობის ფაქტის შესახებ და გენერალურ ინსპექციას საკითხით დაინტერესებისკენაც მოუწოდებდნენ, თუმცა, მოთხოვნას რეაგირება არ მოჰყოლია.

არასამთავრობო ორგანიზაციების განცხადებით, თბილისის მერის ინიციატივა ამხანაგური მატჩის შესახებ მიმართული იყო სოლიდარობისა და შემწყანებლობისკენ, თუმცა დანაშაული და რასიზმი თანამდებობის პირებს ოფიციალურად არ დაუგმიათ.

"გამოძიების მიმდინარეობის პარალელურად, გამოვლინდა სტუდენტებზე სავარაუდო ზეწოლის მცდელობა. სამართალდამცავები და ბელიაშვილის ქუჩაზე მცხოვრები ინციდენტში მონაწილე საქართველოს მოქალაქეები, სავარაუდოდ, ცდილობენ გავლენა მოახდინონ სტუდენტების ნაწილზე, რომ მათ უარი განაცხადონ უკვე მიცემული ჩვენებების სისწორეზე და შეცვალონ მათი შინაარსი, რათა გამოძიება შეწყდეს, სავარაუდოდ, სისხლის სამართლის დანაშაულის ნიშნების არარსებობის არგუმენტით", - ნათქვამია განცხადებაში.

არასამთავრობოებს მიაჩნია, რომ გამოძიება არაობიექტურად მიმდინარეობს.

"უკიდურესად საგანგაშოა თავად შინაგან საქმეთა სამინისტროს თანამშრომლებისა და პოლიტიკური თანამდებობის პირების სავარაუდო მცდელობა დანაშაულის შესაძლო მიჩქმალვისა და გამოძიების შეწყვეტის მიზნით", - აცხადებენ არასამთავრობოები.

მათივე პოზიციით, აღნიშნული კიდევ ერთხელ ცხადყოფს, რომ სახელმწიფო სათანადოდ არ რეაგირებს დისკრიმინაციულ ნიადაგზე ჩადენილ დანაშაულებზე და ვერ უზრუნველყოფს ეფექტიან გამოძიებას.

არასამთავრობო ორგანიზაციები შსს-ს მოუწოდებენ:

• დაუყოვნებლივ მიიღოს ზომები 8 აპრილის ინციდენტთან დაკავშირებით და სათანადოდ დასაჯოს დამნაშავე პირები. ამ კუთხით განსაკუთრებით მნიშვნელოვანია დანაშაულის რასისტული მოტივის იდენტიფიცირება;
• გენერალურმა ინსპექციამ დაუყოვნებლივ დაიწყოს სამინისტროს თანამშრომელთა შესაძლო გადაცდომების მოკვლევა;
• საზოგადოების ინტერესის გათვალისწინებით, გაასაჯაროოს გამოძიების მიმდინარეობა და შედეგები.

საქართველოს პროკურატურას:

• შეისწავლოს და რეაგირება მოახდინოს პოლიციის თანამშრომლების მიერ განხორციელებულ შესაძლო სამსახურებრივი უფლებამოსილების გადამეტების ან/და ბოროტად გამოყენების ფაქტებზე;
• გამოძიების მიმდინარეობისას გადაცდომების დადასტურების შემთხვევაში, გადასცეს საქმის გამოძიება საქართველოს შინაგან საქმეთა სამინისტროს სხვა სტრუქტურულ დანაყოფს.

განცხადებას ხელს ცხრა არასამთავრობო ორგანიზაცია აწერს:

1. ტოლერანტობის და მრავალფეროვნების ინსტიტუტი (TDI)
2. დემოკრატიისა და უსაფრთხო განვითარების ინსტიტუტი (IDSD)
3. მედიის განვითარების ფონდი (MDF)
4. კავშირი “საფარი”
5. საქართველოს რეფორმების ასოციაცია (GRASS)
6. საქართველოს დემოკრატიული ინიციატივა (GDI)
7. კონსტიტუციის 42-ე მუხლი
8. საქართველოს ახალგაზრდა იურისტთა ასოციაცია (GYLA)
9. ღია საზოგადოების ფონდი (OSGF)