ხორავას ქუჩაზე მოკლული ლევან დადუნაშვილის მამა ამბობს, რომ მის შვილთა ერთად მოკლულის, დავით სარალიძის მამასთან პარლამენტის შენობასთან სასაუბროდ მივიდა. ამის შესახებ მან TV პირველის ეთერში განაცხადა.

"გავაკეთე განცხადება, დავაფიქსირე ჩემი შეხედულება, ზაზას გადავეხვიე. მინდოდა რაღაც ორი წინადადება კაცური, ჩემი შეხედულება, მეთქვა... ამის საშუალება არ მომცეს. ზაზა წამოვიდა, ზაზა ჩამეხუტა და მზად იყო მოესმინა ჩემთვის. თუ როგორ გამოვუხატავდი თანადგომას მარტო იმისთვის უნდა მეთქვა", - განაცხადა ლევან დადუნაშვილის მამამ.

მისი თქმით, მას ზაზა სარალიძესთან გულწრფელი საუბარი უნდოდა.

"ნუგეში უნდა მიმეცა და ჩემი აზრი, რომელიც მე გამაჩნია - ხელისუფლებამ რაღაც ნაბიჯი გადადგა. მოდი, ასე ხო არ ჯობია? რაღაცას რჩევას ვკითხავდი, რაღაცას დარიგებას მივცემდი. ადამიანები ვართ, ხო? შეიძლება ცოტა შანსი მქონდა, მაგრამ თუ ჩემი გულწრფელი აზრი გაინტერტერესებთ, ზაზა წამომსვლელი იყო ლაპარაკზე, მაგრამ... მართულის შთაბეჭდილება დატოვა ჩემზე", - თქვა დადუნაშვილმა.

ის დღეს აქციაზე სიტყვითაც გამოვიდა და აღნიშნა, რომ აქციაზე მისი მისვლის მიზეზი ერთ-ერთი გამომსვლელი გახდა, რომელიც ამბობდა, რომ ლევან დადუნაშვილის ნათლიაა, რაც სიმართლე არ იყო.

"მე არ მინდა რევოლუცია, მე მინდა ჩემი შვილის მკვლელების დასჯა", - განაცხადა მან აქციაზე სიტყვით გამოსვლისას.

თბილისში აქცია #ნუმომკლავ მეორე დღეა იმართება. აქცია მას შემდეგ დაიწყო, რაც თბილისის საქალაქო სასამართლოს გადაწყვეტილებით ხორავას ქუჩაზე მოკლული დავით სარალიძის მკვლელი ვერ დადგინდა.

გაიგეთ მეტი ხორავას ქუჩაზე არასრულწლოვნების მკვლელობისა და შემდეგ განვითარებული მოვლენების შესახებ