"ეკლესია გამაერთიანებელია და, ბუნებრივია, ყველას მშვიდობისაკენ მოვუწოდებთ. ჩვენ მხარს ვერ დავუჭერთ უმართავი პროცესების განვითარებას, მით უმეტეს, რომ შემხვედრი ნაბიჯები იდგმება", - ხორავას ქუჩაზე მომხდარ მკვლელობასა და განვითარებულ მოვლენებთან დაკავშირებით საქართველოს საპატრიარქო განცხადებას ავრცელებს.

საპატრიარქოს განცხადებით, მოკლული დავით სარალიძის მამა, ზაზა სარალიძე არის სამართლიანად განაწყენებული და მართალი "თუნდაც მისი არგუმენტები არ იყოს ბრალდებისათვის საკმარისი, როგორც ზოგიერთს მიაჩნია."

საპატრიარქოში ამბობენ, რომ მისასალმებელია გამოძიების დაწყება და კომისიის შემქნა, აუცილებელია საზოგადოების ჩართულობაც, თუმცა, მათივე თქმით გასაკეთებელი სხვაც ბევრია:

"ხელისუფლებამ აუცილებლად უნდა გაითვალისწინოს ის რეალობა, რომ ხალხს მეტი თანადგომა სჭირდება, როგორც სოციალური პრობლემების მოგვარებაში, ისე, პირველ რიგში, სამართლიანი და ეფექტური მართლმსაჯულების აღსრულების თვალსაზრისით და ეს მხოლოდ სალარიძის საქმეს არ ეხება."

საპატრიარქოში აცხადებენ, რომ ამ მიმართულებებით ქმედითი ღონისძიებების სწრაფი წესით გატარება უმნიშვნელოვანესია, რომ საზოგადოებას კარგა ხნის წინ გაჩენილი განცდა დაუცველობისა და უსამართლობისა მოეხსნას.

საპატრაირქოს განცხადებით, თუ ხელისუფლება გამოიჩენს მკაფიო პოლიტიკურ ნებას, დავით სარალიძის და ლევან დადუნაშვილის საქმის ეფექტური გამოძიება ამ პროცესის ერთერთ ყველაზე მნიშვნელოვან ეტაპად იქცევა.

გუშინ, 31 მაისს თბილისის საქალაქო სასამართლომ ხორავას ქუჩის საქმეზე ერთი ბრალდებული სარალიძის ნაწილში გაამართლა, ხოლო მეორე ბრალდებულს სარალაძის ნაწილში მუხლი შეუცვალეს და განზრახ მკვლელობიდან, მკვლელობის მცდელობად გადაკვალიფიცირდა.

განაჩენის გამოცხადების შემდეგ ზაზა სარალიძემ პროკურატურასთან აქცია გამართა და შოთაძის გადადგომა და საქმეში გარეული პირების დასჯა მოითხოვა. რამდენიმე საათში ირაკლი შოთაძე გადადგა.

პარლამენტის თავმჯდომარემ, ირაკლი კობახიძემ განაცხადა, რომ საქმეზე საპარლამენტო საგამოძიებო კომისია შეიქმნება. ეს არის პირველი შემთხვევა, როდესაც სისხლის სამართლის დაუსრულებელ საქმეზე საპარლამენტო საგამოძიებო კომისია იქმნება. პრემიერმა კი განაცხადა, რომ საქმეს შსს უკან იბრუნებს და გამოძიება განახლდება.