იუსტიციის მინისტრის თეა წულუკიანის განცხადებით, ხორავას ქუჩაზე მოკლული დავით სარალიძის მამას, ზაზა სარალიძეს არ ჰყავს იმაზე უკეთესი მოკავშირე, ვიდრე საქართველოს მთავარი პროკურორი.

"ამას არ ვიტყოდი ასე რომ არ იყოს. შესაბამისად, 'გამოდი, შემხვდი ქუჩაში და გამოვიძიოთ საქმე ქუჩაში' - ეს არის საქმე, რომელიც არის მკვლელობის საქმე. ეს ბავშვთა მკვლელობის საქმეა. ამიტომ, ასეთი საქმეების ქუჩაში გამოძიება არ ხდება. შესაბამისად, ჩვენ დაზარალებული და სახელმწიფო ერთი ინტერესის მსახურში ვართ, ყველაფერი უნდა გავაკეთოთ იმისთვის, რომ ვიმუშაოთ ერთად".

იუსტიციის მინისტრმა აღნიშნა, რომ, როდესაც პროკურატურამ 100-მდე მოწმე დაკითხა და მხოლოდ ოთხმა ითანამშრომლა, "პროკურატურა და მათ შორის მთავარი პროკურორი სასწაულებს ვერ მოახდენს".

თბილისის საქალაქო სასამართლომ ხორავას ქუჩის საქმეზე ერთი ბრალდებული სარალიძის ნაწილში გაამართლა, ხოლო მეორე ბრალდებულს სარალაძის ნაწილში მუხლი შეუცვალეს. კერძოდ, მუხლი განზრახ მკვლელობიდან მკვლელობის მცდელობად გადაკვალიფიცირდა.

დავით სარალიძის მკვლელობაში ბრალდებული გამოძიებას არ ჰყავს და დაკავებულს ედავებიან მხოლოდ განზრახ მკვლელობის მცდელობას.

საგანგებო ბრიფინგზე, მთავარმა პროკურორმა, ირაკლი შოთაძემ განაცხადა, რომ სასამართლოს განაჩენს არ იზიარებს და პროკურატურა მას გაასაჩივრებს. პროკურატურა გეგმავს საქმეში შვეიცარიელი ექსპერტები და უცხოელი, ცნობილი პროკურორები ჩართონ.

პარლამენტის თავმჯდომარემ, ირაკლი კობახიძემ განაცხადა, რომ საქმეზე საპარლამენტო საგამოძიებო კომისია შეიქმნება. ეს არის პირველი შემთხვევა, როდესაც სისხლის სამართლის დაუსრულებელ საქმეზე საპარლამენტო საგამოძიებო კომისია იქმნება.