"აბსოლუტურად ნაჩქარევი და გაუგებარია პოლიტიკური შეფასებები თითქოს, პაპუაშვილის განცხადებასთან დაკავშირებით არაფერი ხდება", - ეს განცხადება პრეზიდენტის ადმინისტრაციის უფროსმა, გიორგი აბაშიშვილმა გააკეთა და იმედი გამოთქვა, რომ მოსამართლეებზე ზეწოლასთან დაკავშირებით საქართველოს საკონსტიტუციო სასამართლოს თავმჯდომარის განცხადება პროკურატურის მხრიდან ამჯერადაც იგნორირებული არ იქნება:

"მნიშვნელოვანია ხაზი გაესვას, რომ გიორგი პაპუაშვილმა რამდენიმე თვის წინ გააკეთა მსგავსი ტიპის განცხადება და, სამწუხაროდ, ამას პროკურატურის მხრიდან, როგორც ჩანს, არანაირი რეაგირება არ მოჰყვა. იმედია, რომ ამ შემთხვევაში მსგავსი რამ არ განმეორდება და მსგავსი გულგრილობით არ მოხდება ამ ფაქტის კვლავ გვერდზე გადადება".

მან ასევე განმარტა, რომ პრეზიდენტისა და პაპუაშვილის შეხვედრის დრო ზუსტდება და ის უახლოეს დღეებში შედგება. აბაშიშვილი მიიჩნევს, რომ ამ შეხვედრის შემდეგ უფრო მეტი დეტალი გახდება ცნობილი.

21 ივლისს საკონსტიტუციო სასამართლოს თავჯდომარემ, გიორგი პაპუაშვილმა განაცხადა, რომ რომ სასამართლოს მოსამართლეებზე და მათ ახლობლებზე ზეწოლა, თვალთვალი და მუქარა მიმდინარეობს.