"სახალხო დამცველი მოუწოდებს პროკურატურას დაუყოვნებლივ დაიწყოს გამოძიება მკვლელობაში მონაწილე სხვა დამნაშავეების გამოსავლენად", - ნინო ლომჯარია ხორავას ქუჩაზე მომხდარი მკვლელობის სასამართლო განაჩენს ეხმაურება.

ომბუდსმენის განცხადებით, სხვა პირების მიმართ გამოძიების დაწყების საფუძველი აქამდეც არსებობდა, ვინაიდან ექსპერტიზის დასკვნით, დავით სარალიძის სასიკვდილო ჭრილობა არ იყო მიყენებული გამოძიების მიერ მოპოვებული იარაღით:

"გამოძიების მასალებს სახალხო დამცველის აპარატი სრულად შეისწავლის. სასამართლომ დაადასტურა ეჭვები. გამოძიებამ დავით სალარიძის მკვლელობაში ბრალდებული პირები სრულად ვერ გამოავლინა. მიუხედავად იმისა, რომ გამოძიების მიმდინარეობისას დაზარალებული აღნიშნულ გარემოებას ღიად აპელირებდა, გამოძიება სხვა პირების ბრალეულობაზე არ დაწყებულა. პროკურატურა გამორიცხავდა სხვა პირების მონაწილეობას. სახალხო დამცველი მოუწოდებს პროკურატურას დაუყოვნებლივ დაიწყოს გამოძიება მკვლელობაში სხვა მონაწილე დამნაშავეების გამოსავლენად".

მთავარი პროკურორის განცხადებით, ხორავას ქუჩის საქმის გამოძიებაში ჩაერთვებიან საერთაშორისო პროკურორები და ასევე ექსპერტიზა ჩატარდება შვეიცარიის საექსპერტო ბიუროში. პროცესში ჩართვის საშუალება ექნება ზაზა სარალიძესაც.

დავით სარალიძის მკვლელობაში ბრალდებული გამოძიებას არ ჰყავს და დაკავებულს ედავებიან მხოლოდ განზრახ მკვლელობის მცდელობას.

პროკურორომა, მარიამ გოგოხიამ განაცხადა, რომ განაჩენს სააპელაციო სასამართლოში გაასაჩივრებს.