რუსი ჟურნალისტი არკადი ბაბჩენკო, რომლის გარდაცვალების შესახებ ინფორმაციაც გუშინ, 29 მაისს გავრცელდა, ცოცხალია. უკრაინის უსაფრთხოების სამსახურის ინფორმაციით, მკვლელობა ინსცენირებული იყო.

პირდაპირ ეთერში, ბაბჩენკოს მკვლელობის საქმეზე პრესკონფერენციისას, უსაფრთხოების სამსახურის ხელმძღვანელმა, ვასილი გრიცაკმა განაცხადა, რომ შეეძლო მიესამძიმრებინა არკადი ბაბჩენკოს ოჯახისთვის, თუმცა ამას არ გააკეთებდა და ბაბჩენკო ოთახში მიიწვია. ბაბჩენკოს გამოჩენამ ჟურნალისტებში გაოცება გამოიწვია.

პრესკონფერენციაზე ბაბჩენკომ განაცხადა, რომ მისი მკვლელობა რუსულმა სპეცსამსახურებმა შეუკვეთეს. მისივე თქმით, 2 თვის წინ ამცნობეს, რომ მოკვლას უპირებდნენ და აჩვენეს მისივე პასპორტის სურათი, რომელზე წვდომის მოპოვებაც მხოლოდ რუსულ სპეცსამსახურებს შეეძლოთ.

ბაბჩენკო დათანხმდა მონაწილეობა მიეღო უკრაინული სპეცსამსახურების გამოძიებაში, რომლის გეგმაც მისი სიკვდილის ინსცენირებას ითვალისწინებდა. ბაბჩენკომ ბოდიში მოუხადა თავის ცოლს, რომელსაც სპეცოპერაციის შესახებ ინფორმაცია არ ჰქონდა.