განახლება: არკადი ბაბჩენკო ცოცხალია, მკვლელობა ინსცენირებული იყო

კიევში ცნობილი რუსი ჟურნალისტი, არკადი ბაბჩენკო მოკლეს. როგორც BBC-ის რუსული გამოცემა წერს, უცნობმა თავდამსხმელმა მას სახლში ზურგში ესროლა. ჟურნალისტი სასწრაფო დახმარების მანქანაში გარდაიცვალა.

როგორც პოლიციის წარმომადგენელმა განაცხადა, თავდასხმისას ბაბჩენკოს ცოლი სააბაზანოში იყო, რა დროსაც გასროლა გაიგონა. ამ დროისთვის უცნობია ვინ არის თავდამსხმელი, ასევე, უცნობია მკვლელობის მოტივი.

უკრაინსკაია პრავდა წერს, რომ ჟურნალისტს სამჯერ ესროლეს და სამივეჯერ ზურგში. მკვლელობის საქმეზე გამოძიება უკვე დაწყებულია.

არკადი ბაბჩენკო მოსკოვის კომსომოლისთვის სამხედრო ჟურნალისტად მუშაობდა. ასევე, წერდა ნოვაია გაზეტასთვისა და სხვა გამოცემებისთვის. ჟურნალისტი აშუქებდა ცხინვალის რეგიონისა და დასავლეთ უკრაინაში მიმდინარე კონფლიქტებს.

ბაბჩენკო ხშირად აკრიტიკებდა რუსეთის ხელისუფლებას. დამოუკიდებელი არჩევნების მოთხოვნით არეულობისკენ მოწოდების ბრალდებით 2012 წელს მის წინააღმდეგ სისხლის სამართლის საქმე აღიძრა.

2017 წელს ბაბჩენკომ განაცხადა, რომ არაერთი მუქარის მიღების გამო რუსეთს ტოვებდა.