რუსეთის დუმის თავდაცვისა და უსაფრთხოების კომიტეტის მდივნის პირველი მოადგილე ფრანც კლინცევიჩი აცხადებს, რომ პოპულარული თამაში Pokemon Go რუსეთის ფედერაციის სახელმწიფო უსაფრთხოებას რისკის ქვეშ აყენებს.

TASS-ის ცნობით, პარლამენტარი ფიქრობს, რომ აღნიშნული თამაშის საშუალებით რუსეთში დესტრუქციული პროცესების წამოწყების საშიშროება არსებობს:

"თამაშის დეტალურად შესწავლის, ფსიქოლოგებთან და სპეცსამსახურებთან კონსულტაციის გავლის შემდეგ, მივედი დასკვნამდე, რომ თამაში Pokemon GO, რომელსაც დასავლეთში უვნებლად მიიჩნევენ, რუსეთის ტერიტორიაზე საშიში იარაღია".

კლინცევიჩის აზრით, რუსეთის წინააღმდეგ აგორებული საინფორმაციო ომის პირობებში, Pokemon Go შეიძლება სერიოზულ საზოგადოებრივ მანიპულატორად გადაიქცეს. მისი თქმით, ახალგაზრდებში პოპულარული თამაში შესაძლოა საზოგადოებრივი აზრის ფორმირებისთვის გამოიყენონ და შედეგად ქვეყანამ გადატრიალებაც კი მიიღოს.

"დამიჯერეთ, მე, როგორც ადამიანმა, რომელმაც იცის რა არის ფსიქოლოგიური ოპერაციები და აცნობიერებს როგორ შეიძლება მოიპოვონ ინფორმაცია ასეთი მეთოდებით, ვფიქრობ, რომ ეს თამაში უფრო და უფრო საშიში ხდება," განაცხადა კლინცევიჩმა.

Pokemon Go-ს რუსეთში სხვა მოწინააღმდეგეც გამოუჩნდა. სანკ-პეტერბურგის მართლმადიდებელ კაზაკთა ატამანი ანდრეი პოლიაკოვი თვლის, რომ ვირტუალურ რეალობაში ჩათრეული ახალგაზრდობა სახელმწიფომ დროზე უნდა გამოაფხიზლოს და თამაში აკრძალოს, რადგან სულ მალე ეს ისტერია სატანიზმში გადაიზრდება.