დღეს, 26 მაისს თავისუფლების მოედნიდან პრემიერ მინისტრმა, გიორგი კვირიკაშვილმა საქართველოს მოსახლეობას მიმართა და დამოუკიდებლობის აღდგენა მიულოცა. კვირიკაშვილმა მიმართა პატრიარქს, ქვეყნის სტუმარ 7 პრეზიდენტს, პარლამენტის წევრებს და პარტნიორებს. პრემიერმა დამოუკიდებლობის დღე მიულოცა პირველი რესპუბლიკის დამფუძნებლის შთამომავლებსაც, რომლებიც დღესასწაულის აღსანიშნავად ეწვიენ საქართველოს.

კვირიკაშვილმა ისაუბრა პირველი რესპუბლიკის შექმნაზე და იმ ისტორიულ ფაქტორებზე, რომელმაც გავლენა მოახდინა მის ჩამოყალიბებაზე:

"ქვეყნის ცხოვრებაში დგება დღეები და წუთები, რომლებიც მომავალს ქმნიან და ერის ბედს წყვეტენ. 100 წლის წინ სწორედ ასეთი დღე იყო საქართველოსთვის 26 მაისი. ეს დღე იყო ისტორიის ლოგიკური განვითარების, მარადიული ეროვნული ენერგიის და მრავალი თაობის უდიდესი ძალისხმევის შედეგი. დღეს არ შეიძლება, არ გავიხსენოთ, XIX საუკუნის 90-იანელების, თერგდალეულების, ეროვნულ-განმათავისუფლებელი მოძრაობის ისტორიული როლი. ქართული პოლიტიკური და სამართლებრივი აზრი ნაბიჯ-ნაბიჯ მიიწევდა წინ, ქართული სახელმწიფოს ჩამოყალიბებისკენ და ამზადებდა 1918 წლის 26 მაისს."

პრემიერმა აღნიშნა, რომ საქართველოს ევროატლანტიკური მომავალი სწორედ პირველმა რესპუბლიკამ განაპირობა:

"პირველი რესპუბლიკის გამოცდილება ჩვენი დასავლური იდენტობის დამადასტურებელი კიდევ ერთი ძლიერი არგუმენტია. და ის, რომ საქართველო დღეს ასე მყარად დგას ევროპასთან და ნატოსთან ინტეგრაციის გზაზე, სწორედ იქიდან იღებს სათავეს."

პრემიერმა განაცხადა, რომ დღეს საქართველოს თითოეული მოქალაქე ქმნის ისტორიას:

"ყოველ ჩვენგანს გვაკისრია მისია, რომ 100 წლის წინ ჩაყრილ საძირკველს დავაშენოთ კეთილდღეობასა და სულიერ ძლიერებაზე დამყარებული ქართული სახელმწიფო. მე მჯერა, რომ 100 წლის წინ დადებულ ფიცს დღეს ბოლომდე აღვასრულებთ და საქართველო დამკვიდრდება, როგორც ძლიერი და დემოკრატიული სახელმწიფო".

დღეს, 26 მაისს საქართველოს დამოუკიდებლობის აღდგენის 100 წლისთავი აღინიშნება.