პირს, რომელიც ჟურნალისტ ინგა გრიგოლიას ემუქრებოდა, აღმკვეთი ღონისძიების სახით პატიმრობა შეეფარდა. ამის შესახებ On.ge-ს საქართველოს პროკურატურაში განუცხადეს.

პროკურატურის ინფორმაციით, ბრალდებულმა ინგა გრიგოლიასთან მისთვის არასასურველი კომუნიკაცია დაამყარა, დაადგინა მისი მობილური ტელეფონის ნომერი, სამსახურის მისამართი და დაუწყო უკანონო თვალთვალი: სისტემატიურად ურეკავდა ტელეფონზე, სთხოვდა შეხვედრას, აკითხავდა სამსახურთან და საცხოვრებელ სახლთან, უგზავნიდა მოკლე ტექსტურ შეტყობინებებს და ხელნაწერ წერილებს, სთხოვდა თითქოსდა საერთო შვილის ჩვენებასა და ვითომდა მითვისებული ქონების დაბრუნებას. ხსენებული მოთხოვნების შესასრულებლად კი მასზე სისტემატიურ ფსიქოლოგიურ ზეწოლას ახორციელებდა, ემუქრებოდა ჯანმრთელობისა და ქონების დაზიანებით.

"ბრალდებულის ქმედებებით, რომელიც 2018 წლის 10 მაისამდე გრძელდებოდა, ინგა გრიგოლია ფსიქიკურ ტანჯვას განიცდიდა და მუქარის განხორციელების მუდმივი რეალური საფრთხის და შიშის განცდა ჰქონდა", - ნათქვამია პროკურატურის განცხადებაში.

სამართალდამცველებმა ბრალდებული 2018 წლის 21 მაისს თბილისში დააკავეს.
სისხლის სამართლის საქმეზე გრძელდება გამოძიება. წარდგენილი ბრალდება სასჯელის სახედ და ზომად 2 წლამდე თავისუფლების აღკვეთას ითვალისწინებს.