გიორგი გაბედავა, რომელიც ჰომოფობიური განცხადებებით გამოირჩევა, ამბობს რომ მისივე დაფუძნებულ ორგანიზაციას, საქართველოს ახალგაზრდა ეროვნულ ალიანსს აუქმებს და დამოუკიდებელ აქტივისტად საქმიანობას იწყებს.

გაბედავას განმარტებით, ორგანიზაცია დამატებით პრობლემებს უქმნის და ხშირად უწევს თავის მართლება:

"ჟურნალისტები აშუქებდნენ არასწორად, ხან "მარშს" მიმაწერეს, ხან "იდეას". გავიცანი ახალგაზრდები, რომლებიც არიან აპოლიტიკურები, როგორც მე და რადგან ორგანიზაცია მქონდა, მაინც გადიოდა ეს პოლიტიკურში".

გაბედავა ამბობს, რომ სხვა "ეროვნული იდეოლოგიის" ორგანიზაციებიც იწვევდნენ ხოლმე თავიანთ აქციებზე:

"უარის თქმაც არ გამომდიოდა, ცოტა უფროსი თაობის ხალხია".

საერთაშორისო გამჭვირვალობა - საქართველოს კვლევის თანახმად, გიორგი გაბედავა 2013 წლის 17 მაისის ძალადობრივი დემონსტრაციის ერთ-ერთი აქტიური ორგანიზატორი იყო. ის რამდენჯერმე იყო დაკავებული პოლიციისთვის წინააღმდეგობის გაწევის გამო. მათ შორისაა, რამდენიმე დღის წინ კლუბ ბასიანში და კაფე გალერიში სპეცოპერაციის შემდეგ გამართული აქციის კონტრაქციაზე წვრილმანი ხულიგნობისთვის დაკავება.

გიორგი გაბედავა რუსეთში მცხოვრები ქართველი მომღერლის, სოსო პავლიაშვილის ნათლული და პროდიუსერია. ის თებერვალში რუსეთში სცემეს და დაჭრეს.