დღეს, 19 მაისს თეთრი ხმაურის მოძრაობის მიერ შინაგან საქმეთა მინისტრისთვის მიცემული დრო ამოიწურა. 13 მაისს გავრცელებული ინფორმაციით, თუ საქართველოში არსებული ნარკოპოლიტიკის საკითხებზე შეთანხმება არ შედგებოდა დაიწყებოდა საპროტესტო აქციები. შეთანხმება ამ დრომდე ვერ შედგა, თუმცა აქციებიც არ დაწყებულა. მიზეზებზე თეთრი ხმაურის მოძრაობა განცხადებას ავრცელებს.

"დაანონსებული აქციის საკითხს გადავწყვეტთ მას შემდეგ, რაც მოვისმენთ სამინისტროს პოზიციას რეფორმასთან დაკავშირებით. ყველასთვის მნიშვნელოვანია ვიცოდეთ, ორწლიანი მუშაობის შემდგომ, რამდენად მზადაა სახელმწიფო ცვლილებისთვის და შევძლებთ თუ არა მოხმარებისთვის ციხეში მჯდომი უდანაშაულო მოქალაქეების დახსნას, ავირიდებთ, თუ არა მომავალში პირადი მოხმარების მიზნით მიზერული ოდენობის სუბსტანციების ფლობისთვის ადამიანთა მომავლის განადგურებას", - ვკითხულობთ განცხადებაში.

თეთრი ხმაურის მოძრაობაში აცხადებენ, რომ მათთვის გადამწყვეტი მნიშვნელობა აქვს საზოგადოებრივ აზრსა და მხარდაჭერას.

"გვსურს, გთხოვოთ თითოეულ თქვენგანს, ვკონცენტრირდეთ და გავძლიერდეთ, არ ვუღალატოთ ჩვენს ბრძოლას გადამწყვეტ მომენტში, ჩვენ არ ვაპირებთ ვაპატიოთ პოლიტიკურ ძალაუფლებას ჩვენი ღირსებისა და თავისუფლების მუდმივი ხელყოფა, ვიფიქროთ, ცივი გონებით და ვიაროთ ერთობლივი სტრატეგიით გამარჯვებამდე", - აღნიშნულია გავრცელებულ განცხადებაში.

საქართველოში არსებული ნარკოპოლიტიკის შეცვლა ერთ-ერთი მოთხოვნა იყო თბილისში, პარლამენტის შენობის წინ 12 და 13 მაისს გამართულ აქციებზე. მაშინ საქართველოს შინაგან საქმეთა მინისტრმა აქციის მონაწილეებს მიმართა და ამ საკითხზე მუშაობას დაპირდა.

ამავე თემაზე: ბასიანსა და გალერიში ჩატარებული სპეცოპერაციის შედეგები - მოკლედ