მელბურნის ტექნოლოგიური სამეფო ინსტიტუტის მეცნიერებმა ახალი ნანო-ტექნოლიგია შეიმუშავეს, რომლის საშუალებითაც ქსოვილის "გარეცხვა" სინათლის საშუალებით შეიძლება. სპეციალურად შექმნილი ნანო სტრუქტურები სინათლეზე გატანის შედეგად ზედაპირზე მოხვედრილი ორგანული მასის დეგრადირებას ახდენს.

ამ მეთოდით ქსოვილზე ლაქების ამოყვანა ნათურის დანათებით ან გამომზეურებით შეიძლება.

მეცნიერთა გუნდის ხელმძღვანელის, დოქტორი რაჯეშ რამანათანის თქმით, ახალი პროცედურა ადვილად შეიძლება დაინერგოს ყოველდღიურ ინდუსტრიაში:

"სარეცხის მანქანების გადაყრა ჯერ ადრეა, მაგრამ ძალიან მალე ჩვენ გვექნება ქსოვილები და მათგან შექმნილი სამოსი, რომელსაც თვით-გასუფთავება შეეძლება."

RMIT-ის (მელბურნის ტექნოლოგიური სამეფო ინსტიტუტი) მეცნიერები სპილენსა და ვერცხლზე დაფუძნებულ ნანო სტრუქტურებზე მუშაობდნენ. როდესაც ეს ნანო სტრუქტურები სინათლეს იღებენ, მათი ენერგია ძლიერდება და ე.წ. "ცხელ ელექტრონებს" გამოიმუშავებენ, რომლებიც თავის მხრივ ენერგიას ასხივებენ, რაც ხელს უწყობს ორგანული მასალის დაშლას.

ამჟამად ჯგუფი ტექნოლოგიის ყოველდღიურ მოხმარებაში დანერგვის მეთოდზე მუშაობს.

"ჩვენ გვინდა ვნახოთ რამდენად მალე შეძლებს ნანო სტრუქტურა დაშალოს ისეთი ლაქები, როგორიცაა პომიდვრის სოუსის ან ღვინის ლაქა, რაც საინტერესო იქნება მომხმარებლისთვის და შესაბამის ბაზარს შექმნის ასეთი ქსოვილისთვის." განაცხადა რამანათანმა.

სტატია ახალი ტექნოლოგიის შესახებ სამეცნიერო ჟურნალში Advanced Materials Interfaces დაიბეჭდა.