ახალი კანონპროექტის თანახმად, სასამართლოს შემოქმედებითი ნაწარმოების გავრცელების აკრძალვა შეეძლება.

კულტურის შესახებ კანონის ამჟამინდელი რედაქციით შემოქმედებითი ნაწარმოების გავრცელება დაუშვებელია თუ ის ლახავს სხვა ადამიანის უფლებებსა და კანონიერ ინტერესებს, აღვივებს ეროვნულ, ეთნიკურ, რელიგიურ და რასობრივ შუღლს, ქადაგებს ომსა და ძალადობას და პროპაგანდას უწევს პორნოგრაფიას.

კანონპროექტის ავტორების, ეკა ბესელიასა და ლევან გოგიჩაიშვილის ინიციატივით, ყველა ამ მიზეზით შემოქმედებითი ნაწარმოების გავრცელების აკრძალვის დასაშვებობას სასამართლო განსაზღვრავს.

კონსტიტუციის ახალი რედაქციის მე-20 მუხლში კი ვკითხულობთ, რომ სასამართლოს გადაწყვეტილებით შემოქმედებითი ნაწარმოების გავრცელების აკრძალვა შესაძლებელია, თუ ის სხვათა უფლებებს ლახავს.

განმარტებით ბარათში ვკითხულობთ, რომ კანონპროექტის მიღების მიზანია საქართველოს მოქმედ კანონმდებლობის საქართველოს კონსტიტუციაში შეტანილ ცვლილებებთან ჰარმონიზება.

გარდა ამისა, ცვლილებები შედის საქართველოს სამოქალაქო საპროცესო კოდექსში. სამოქალაქო საქმეების ჩამონათვალს ემატება შემოქმედებითი ნაწარმოების გავრცელების აკრძალვასთან დაკავშირებული საქმეები, თუ ნაწარმოების გავრცელება ლახავს სხვათა უფლებებს

აღნიშნული ცვლილება ამოქმედდება საქართველოს პრეზიდენტის მომდევნო არჩევნებში არჩეული საქართველოს პრეზიდენტის მიერ ფიცის დადებისთანავე.

იურისტი გიორგი მშვენიერაძე On.ge-სთან ამბობს, რომ ახალი ცვლილება ცენზურის დასაშვებობას ქმნის:

"აქედან გამომდინარე ეს ცვლილება, ჩვენი სასამართლო მდგომარეობის პირობებში, არის ფაქტობრივად ცენზურის დაწესება".

მისივე განმარტებით, მხატვრული შემოქმედების აკრძალვის უფლება აქამდე არავის ჰქონდა და კონკრეტულ შემთხვევებში უბრალოდ დაუშვებელი იყო, ხოლო ახლა ჩნდება მექანიზმი, რითაც მსგავსი ნაწარმოების აკრძალვა ხდება შესაძლებელი.

მშვენიერაძის თქმით, რელიგიური, რასობრივი, ეთნიკური შუღლის გაღვივება, ძალადობის ქადაგება და პორნოგრაფიის გავრცელება არ არის ის საკითხები, რომლითაც შესაძლებელია შემოქმედებითი ნაწარმოები აიკრძალოს.