შინაგან საქმეთა სამინისტროს ინფორმაციით, ამ დროისთვის საბჭოთა სიმბოლიკის გამოყენებისთვის არავინ დაუჯარიმებიათ.

სახელმწიფო უსაფრთხოების სამსახურისგან მიღებული გაფრთხილების მიუხედავად, დღეს, 9 მაისს ვალერი კვარაცხელია და პარტია სოციალისტები უცნობი ჯარისკაცის საფლავთან საბჭოთა სიმბოლიკით მაინც მივიდნენ.

როგორც შსს-მ On.ge-ს უთხრა, რომ კანონის მიხედვით, სიმბოლიკის გამოყენების შემთხვევაში, კანონის დამრღვევს პოლიცია აფრთხილებს, წინააღმდეგობის გაწევის შემთხვევაში კი ჯარიმდება. უწყების განმარტებით, წინააღმდეგობა არავის გაუწევია.

შინაგან საქმეთა სამინისტრომ ვაკის პარკში ორ სხვადასხვა აქციაზე 3 პირი დააკავეს. დაკავებულებს შორის იყვნენ ვალერი კვარაცხელია, მისი თანამოაზრე და ანტისაოკუპაციო აქციის მონაწილე. სამივე მათგანი ადმინისტრაციულ სამართალდარღვევათა კოდექსის 166-ე მუხლით (ხულიგნობა) დააკავეს, ახლა ყველა მათგანი თავისუფალია.