საქართველოს პარლამენტის ყოფილი თავმჯდომარე და დემოკრატიული მოძრაობა - ერთიანი საქართველოს ლიდერი, ნინო ბურჯანაძე ამბობს, რომ ხელისუფლებამ საბჭოთა სიმბოლიკასთან დაკავშირებით უგუნურება არ უნდა გამოიჩინოს. ასე გამოეხმაურა ბურჯანაძე 9 მაისის აქციაზე საბჭოთა სიმბოლიკის გამოყენებას.

"რას ნიშნავს საბჭოთა სიმბოლიკა, როცა საუბარია 9 მაისზე? ეს ადამიანები და ნახევარი მსოფლიო ამ სიმბოლიკით იბრძოდა მეორე მსოფლიო ომში და ელემენტარული უგუნურება არ უნდა გამოიჩინოს ხელისუფლებამ. სიმბოლიკასთან ბრძოლას თავი დავანებოთ და ვებრძოლოთ იმ ცუდს, რაც დღევანდელ საქართველოში ძალიან ნათლად იმეორებს იმას, რაც იმ ეპოქაში არ მოგვწონდა. ცუდს უნდა ვებრძოლოთ და არა სიმბოლიკას. ეს უბრალოდ უძლურების ნიშანია და სხვა არაფერი", - აღნიშნა ბურჯანაძემ.

დღეს, 9 მაისს სოციალისტები და ვალერი კვარაცხელია უცნობი ჯარისკაცის საფლავთან საქართველოს კანონმდებლობით აკრძალული საბჭოთა სიმბოლიკით მივიდნენ.

სოციალისტური საქართველო სახელმწიფო უსაფრთხოების სამსახურმა წერილობით გააფრთხილა, რომ თუკი 9 მაისს საბჭოთა სიმბოლიკას გამოიყენებენ, სამართალდამცველები კანონით გათვალისწინებულ ნორმებს მიმართავენ.

საბჭოთა სიმბოლიკის გამოყენების აკრძალვა

"თავისუფლების ქარტია საქართველოს კანონის მე-7 მუხლის მე-6 პუნქტის მოთხოვნის შესაბამისად მოგმართავთ, არ დაუშვათ და აღმოფხვრათ ზემოხსენებულ ღონისძიებებზე [9 მაისს] კომუნისტური ტოტალიტარული სიმბოლიკის გამოყენება, წინააღმდეგ შემთხვევაში გამოყენებული იქნება საქართველოს კანონმდებლობით გათვალისწინებული პასუხისმგებლობის ნორმები", - წერია სუს-ის წერილში.

აღნიშნულ წერილს ვალერი კვარაცხელია ფეისბუქის საკუთარ გვერდზე ავრცელებს და მის მომხრეებს მოუწოდებს 9 მაისს დილის 9 საათზე, ვაკის პარკში, უცნობი ჯარისკაცის საფლავთან შეიკრიბონ.

ადმინისტრაციულ სამართალდარღვევათა კოდექსით, გაფრთხილების პირობების შეუსრულებლობა ან არასათანადოდ შესრულება გამოიწვევს უფლებამოსილი პირის დაჯარიმებას 1 000 ლარის ოდენობით.