შემაძრწუნებელი ფოტოები ჰავაიდან, სადაც უკვე ოთხი დღეა, ვულკანი იფრქვევა

ჰავაიზე ვულკანი კილაუეა წინა კვირაში გააქტიურდა და ოთხი დღის შემდეგ ისევ აგრძელებს ლავის ამოფრქვევას. დიდ კუნძულზე ვულკანის ამოხეთქვა 6.9 ბალიანმა მიწისძვრამ გამოიწვია, რომელიც დედამიწის ზედაპირიდან 5 კილომეტრის სიღრმეში მოხდა. CNN-ის ინფორმაციით, ლელიანი-ესთეითში ლავის გამო უკვე დაინგრა 35 შენობა, რომელთაგან 26 ჩვეულებრივი საცხოვრებელი სახლია. ადგილობრივები უკვე 2 მაისს ამჩნევდნენ ასფალტზე გაჩენილ ნაპრალებს, 4 მაისს ვულკანურმა ნასკდომებმა ორთქლის გამოშვება დაიწყეს, მიწისძვრის შემდეგ კი ლავაც გამოჩნდა. ჰავაის მთავრობამ 1700-ზე მეტი ადამიანის ევაკუაციის ბრძანება გასცა.

ჰავაის გუბერნატორმა დევიდ იგემ განაცხადა, რომ ისინი მთელი მსოფლიოდან იღებენ შეტყობინებებს ჰავაის კეთილდღეობით დაინტერესებული ადამიანებისგან და რომ საგანგაშო არაფერია, ვინაიდან მიმდინარე მოვლენები მხოლოდ ვულკან კილაუეას მიმდებარე ტერიტორიას აზარალებს, ხოლო ჰავაის დანარჩენი ნაწილი ხელუხლებელია. მომხდარი მიწისძვრა 1975 წლის შემდეგ ყველაზე ძლიერი მიწისძვრაა კუნძულზე. კილაუეა ყველაზე აქტიური ვულკანია იმ ხუთ ვულკანებს შორის, რომელიც დიდ კუნძულზე მდებარეობს და ოკეანის ზედაპირის ზევით მხოლოდ 100 000 წლის წინ ამოვიდა.

ლელიანი-ესთეითის მაცხოვრებლები ამერიკის წითელი ჯვრის თავშესაფრებში არიან და უსაფრთხო დისტანციიდან ადევნებენ თვალს ლავის დინებას მათ საკუთრებაზე.