ამერიკის შეერთებული შტატები რუსეთში მშვიდობინი მოქალაქეების დაკავებას გმობს და ხელისუფლებას მათი დაუყოვნებლივ გათავისუფლებისკენ მოუწოდებს.

ამის შესახებ აშშ-ს სახელმწიფო დეპარტამენტის პრესსპიკერმა ჰიზერ ნაუერტიმ ტვიტერზე დაწერა.

"პოლიტიკური ლიდერები, რომლებსაც პოლიტიკური ლეგიტიმაცია აქვთ, მშვიდობიან აქტივისტებს საპროტესტო აქციაზე არ აკავებს", - ნათქვამია განცხადებაში.

რუსეთის სხვადასხვა ქალაქში ოპოზიციონერი პოლიტიკოსის ნავალნის მომხრეები აქციებს მართავენ და ვლადიმერ პუტინის მეოთხე ვადით გაპრეზიდენტებას აპროტესტებენ.

მოსკოვში, პუშკინის მოედანზე შეკრებილი ხალხი სკანდირებს სლოგანს: "რუსეთი პუტინის გარეშე", "ის ჩვენი მეფე არ არის".

აქციები პუტინის მორიგ ინაუგურაციამდე ორი დღით ადრე იმართება. ღონისძიება 7 მაისს არის დაგეგმილი.

18 მარტს საპრეზიდენტო არჩევნებზე ვლადიმერ პუტინმა პირადი რეკორდი დაამყარა და ხმების 76,65 პროცენტი (55,7 მილიონი) მიიღო.