თბილისის საქალაქო სასამართლოს კომპანია აიისა რეკლამის კანონზე დაყრდნობით დააჯარიმა და განაცხადა, რომ პრეზერვატივების არსებული ფორმით წარმოება რელიგიურ გრძნობებს შეურაცხყოფდა. სასამართლომ საქმის წარმოება თბილისის ზედამხედველობის სამსახურის ოქმის საფუძველზე დაიწყო.

On.ge დაინტერესდა, რის საფუძველზე გამოსცა მერიის ზედამხედველობის სამსახურმა ოქმი, რომლის მიხედვითაც, აიისა პროდუქტის რეკლამას თბილისში ახორციელებდა, როცა მსგავსი საჯარო რეკლამა არსად გავრცელებულა.

აიისას ინტერესების დამცველის ადვოკატ გიორგი მშვენიერაძის განცხადებით, ზედამხედველობის სამსახურის პოზიციით, პროდუქტის რეკლამად მისი შეფუთვა და რეალიზება ითვლება.

"ზედამხედველობის სამსახური იყო მომჩივანი, ვინაიდან ისინი ამბობდნენ, რომ ინდმეწარმე ანანია გაჩეჩილაძე თბილისში ცხოვრობს და ეს რეკლამა იყიდებოდა თბილისში, ამავდროულად სოციალურ ქსელში ავრცელებდა ფოტოს, დაბუსთულიც არ ყოფილა პოსტი. ზედამხედველობის სამსახურის შეფასებით, პროდუქტის რეკლამა არის ასევე მისი შეფუთვა", - განუმარტა On.ge-ს გიორგი მშვენიერაძემ.

თბილისის მერიის ზედამხედველობის სამსახურის პოზიციით კი რეკლამის გავრცელება გულისხმობს ინფორმაციის გასაჯაროებას ნებისმიერი ფორმით, იქნება ეს ფლაერის დარიგება, სატელევიზიო რეკლამა, ფეისბუქრეკლამა თუ ნებისმიერი სხვა სახით გავრცელების ფორმა.

აიისას იურიდიული წარმომადგენლები მომდევნო კვირაში საკონსტიტუციო სასამართლოში გაასაჩივრებენ რეკლამის კანონის მე-3 მუხლის მე-3 პუნქტს, რომელიც არაკეთილსინდისიერი რეკლამის ცნებას განმარტავს.