2018 წლის აპრილში, წინა თვესთან შედარებით, ინფლაცია 0,2 პროცენტით შემცირდა. მიმდინარე წლიური ინფლაციის დონე კი 2,5 პროცენტს გაუტოლდა. ამ ინფორმაციას საქსტატი ავრცელებს.

რა პროდუქტზე გაიზარდა ფასები

სურსათი და უალკოჰოლო სასმელები

ფასები მომატებულია 2,1 პროცენტით, რაც 0,66 პროცენტული პუნქტით აისახა მთლიანი ინდექსის ზრდაში. ფასები გაიზარდა ხილსა და ყურძენზე (19,7 პროცენტი), ზეთსა და ცხიმზე (3,5 პროცენტი), ხორცსა და ხორცის პროდუქტებზე (3.2 პროცენტი), თევზეულზე (2,4 პროცენტი), რძეზე, ყველსა და კვერცხზე (2,1 პროცენტი), ყავაზე, ჩაისა და კაკაოზე (1,6 პროცენტი).

ტრანსპორტი

ჯგუფში დაფიქსირდა ფასების 2,9 პროცენტიანი ზრდა, რაც წლიურ ინფლაციაზე 0,43 პროცენტული პუნქტით აისახა. ფასები მომატებულია პირადი სატრანსპორტო საშუალებების ექსპლუატაციაზე (4,4 პროცენტი) და სატრანსპორტო მომსახურებაზე (1,9 პროცენტი).

ალკოჰოლური სასმელები, თამბაქო

ჯგუფში ფასები მომატებულია 5,6 პროცენტით, რაც 0,38 პროცენტული პუნქტით აისახა მთლიანი ინდექსის ზრდაში. ჯგუფში ფასები გაიზარდა თამბაქოს ნაწარმზე (11,0 პროცენტი).

საცხოვრებელი, წყალი, ელ. ენერგია, აირი

ფასები გაიზარდა 4,6 პროცენტით. შესაბამისად, ჯგუფის წვლილმა წლიურ ინფლაციაში 0,38 პროცენტული პუნქტი შეადგინა. ფასები მომატებულია წყალმომარაგებისა და საცხოვრებელთან დაკავშირებული სხვა მომსახურების (7,7 პროცენტი), ასევე ელექტროენერგიის, აირის და სათბობის სხვა სახეების (5,2 პროცენტი) ქვეჯგუფებზე.

ჯანმრთელობის დაცვა

ფასები გაიზარდა 4,1 პროცენტით, რაც 0,34 პროცენტული პუნქტით აისახა მთლიანი ინდექსის ზრდაში. ჯგუფში ფასების მატება დაფიქსირდა ქვეჯგუფებზე: სამედიცინო პროდუქცია, აპარატურა და მოწყობილობა (5,3 პროცენტი), ამბულატორიული სამედიცინო მომსახურება (4,5 პროცენტი) და საავადმყოფოების მომსახურება (2,4 პროცენტი).

ფასები შემცირდა

სურსათი და უალკოჰოლო სასმელები

ფასები შემცირდა შაქარზე, ჯემსა და სხვა ტკბილეულზე (-3,7 პროცენტი).