მთავარი პროკურატურის სტატისტიკით, 2017 წელს სამთო, სამშენებლო ან სხვა სამუშაოების წარმოებისას უსაფრთხოების წესების დარღვევის ბრალდებით, სისხლის სამართლებრივი დევნა 38 პირის მიმართ დაიწყო. ამის შესახებ დღეს, 30 აპრილს, მთავარი პროკურატურის მოადგილემ გიორგი გაბიტაშვილმა ადამიანის უფლებათა დაცვის კომიტეტზე, ომბუდსმენის რეკომენდაციებზე პასუხისას ისაუბრა.

38 პირიდან 9 პირის მიმართ წაყენებული ბრალდება ჯანმრთელობის ნაკლებად მძიმე ან მძიმე დაზიანებას გულისხმობდა, ხოლო 29 პირის მიმართ ბრალდება ადამიანის სიცოცხლის მოსპობას ან სხვა მძიმე შედეგს.

გაბიტაშვილის განცხადებით, 2017 წელს (სსკ-ის 170-ე მუხლი) შრომის დაცვის წესების დარღვევის ბრალდებით, სისხლისამართლებრივი დევნა დაიწყო ექვსი პირის მიმართ. მათგან ჯანმრთელობის ნაკლებად მძიმე ან მძიმე დაზიანების და ადამიანის სიცოცხლის მოსპობის ბრალდებით, ასევე 3-3 პირი მისცეს პასუხისგებაში.

მთავარი პროკურორის მოადგილის ინფორმაციით, (სისხლის სამართლის კოდექსის 240-ე მუხლის პრიმა მუხლით) ელექტრო ან თბოენერგიის, გაზის, ნავთობის ან ნავთობპროდუქტების ობიექტებზე უსაფრთხოების წესების დარღვევის ბრალდებით, სისხლის სამართლებრივი დევნა მიმდინარეობს 4 პირის მიმართ.