თურქეთში სახელმწიფო გადატრიალების მომწყობი სამხედრო დაჯგუფება აცხადებს, რომ ქვეყნის მართვა ხელში ჩაიგდეს და ჯარისკაცები სტამბოლისა და ანკარის სტრატეგიულ წერტილებში ჰყავთ განთავსებული.

ადგილობრივი ტელევიზიის ეთერით გაკეთებულ განცხადებაში ნათქვამია, რომ თურქეთში მოხდა სახელმწიფო გადატრიალება, შემოღებულია საგანგებო მდგომარეობა და ქვეყანას მართავს "მშვიდობის საბჭო".

გადატრიალების მომოწყობი ჯგუფის ზომა და მისი ლიდერების ზუსტი ვინაობა ამ დრომდე უცნობია. როიტერის წყაროს მიხედვით, სამხედრო გადატრიალება გულენის მოძრაობის (ჰიზმეთის) განხორციელებულია: "ამის შესახებ გულენისტთა რამდენიმე წარმომადგენელი გასული თვეების განმავლობაში მინიშნებებს აკეთებდა," - აცხადებს პრეზიდენტ ერდოღანთან დაახლოებული პირი.

პრეზიდენტმა ერდოღანმა CNN Turk-ს ინტერვიუ მობილური ვიდეო-ზარით მისცა. მისი განცხადებით, ადგილი აქვს "მცირე ჯგუფის" დაუმორჩილებლობას და "პარალელური სტრუქტურის" მოწყობილ ქმედებებს. იგი ამ ტერმინს წარსულში გულენის მოძრაობის აღსანიშნად იყენებდა.

ერდოღანმა საზოგადოებას მოუწოდა, გავიდნენ ქუჩაში და შეეწინააღმდეგონ სახელმწიფოს დამხობის მსურველებს:

"მე მოვუწოდებ თურქ ხალხს, შეგროვდნენ სკვერებსა და აეროპორტებში. მე არასოდეს მწამდა ხალხის ნებაზე ძლიერი ძალის."

პრეზიდენტის განცხადებით, იგი ამჟამად უსაფრთხოდაა და გადატრიალების მონაწილეები უმკაცრესად დაისჯებიან.

ვრცელდება ინფორმაცია, რომ თურქეთის მაღალი რანგის გენერალი, ჰულუში აკარი, სამხედრო შტაბ-ბინაში მძევლად აყვანილთა შორისაა.

უცხოური მედიის ცნობით, დედაქალაქ ანკარაში ისმის სროლის ხმა და მოხდა სულ მცირე ერთი ძლიერი აფეთქება. სახელმწიფო ტელევიზია კი, რომლის ეთერი ამჟამად გათიშულია, გადატრიალების მონაწილეთა მიერაა აღებული.

რამდენიმე საათის წინ ქვეყანაში დაიბლოკა წვდომა სოციალურ ქსელებთანაც. ამ მომენტამდე თითქმის შეუძლებელია Facebook-ის, Twitter-ის და YouTube-ის მოხმარება.

სოციალურ ქსელებში გავრცლებულ ფოტოებზე ჩანს, რომ ბანკომატებთან რიგებია — მოქალაქეები სახელმწიფო გადატრიალების საფრთხის გამო, ნაღდი ფულის გამოტანას ცდილობენ.

როიტერის ინფორმაციით, ტანკებმა თურქეთის პარლამენტის შენობასთან ცეცხლი გახსნეს. ასევე, ისმის სროლის ხმა სტამბოლსა და ანკარაში. ამას ადასტურებენ ადგილობრივი NTV-ს და სხვა მედიის ჟურნალისტებიც.

ერდოღანის მოწოდებას, ქუჩაში გამოსვლის შესახებ, ბევრი გამოეხმაურა. სტამბოლში, ისტიკლალზე, უამრავი მოქალაქეა შეკრებილი. თუმცა, ზოგიერთის მოწოდებები გადატრიალების მხარდამჭერია.

მოწინააღმდეგეები, გადატრიალების მონაწილეთა ტანკს მშვიდობიანი ფორმით უპირისპირდებიან.

რუსთავი 2-ის ინფორმაციით, სარფში, საქართველო-თურქეთის საზღვარზე ტურისტული მიმოსვლა შეჩერებულია. საზღვრის გადაკვეთა თურქეთის მოქალაქეებს შეუფერხებლად შეუძლიათ. ტურისტებისთვის კი საზღვარი მეზობელი მხარის გადაწყვეტილებით დაიკეტა.

საქართველოს პრეზიდენტმა გიორგი მარგველაშვილმა თურქეთში მიმდინარე მოვლენებთან დაკავშირებით, ეროვნული უშიშროების საბჭოს სხდომა დღეს, ღამის 3 საათზე მოიწვია.

თურქული მედიის ცნობით, ანკარაში 17 პოლიციელი დაიღუპა.

არეულობა სტამბოლსა და ანკარაში 15 ივლისის მიწურულს დაიწყო, როდესაც სამხედროებმა რამდენიმე ხიდი და სტრატეგიული ობიექტი აიღეს.