რეისს თბილისიდან სტამბულის მიმართულებით, რომელზეც მგზავრი გარდაიცვალა, ავიაკომპანია PEGASUS ახორციელებდა.

როგორც On.ge-ს თბილისის აეროპორტში განუმარტეს, თვითმფრინავის აფრენამდე შემოვიდა შეტყობინება მგზავრის შეუძლოდ ყოფნის შესახებ.

"პილოტი ასაფრენ ბილიკამდე მისული არ იყო, როცა უკან მობრუნდა, მივიდა თუ არა ტერმინალთან ექიმი დახვდა, მაგრამ მგზავრი გარდაცვლილი იყო", - განგვიმარტეს აეროპორტის პრესსამსახურში.

კითხვაზე, რატომ არ აღმოუჩინეს სამედიცინო დახმარება ბორტზე დროულად და არის თუ არა ავიახაზის პერსონალი გადამზადებული პირველადი დახმარების მიმართულებით, თბილისის აეროპოტში განგვიმარტეს, რომ ამაზე პასუხისმგებელი PEGASUS-ია და არა, თბილისის აეროპორტი.

On.ge, დეტალების გარკვევის მიზნით, PEGASUS-თან დაკავშირებას ცდილობს.

შინაგან საქმეთა სამინისტროს პირველადი ინფორმაციით, 28 წლის კაცი ბუნებრივი სიკვდილით გარდაიცვალა.

ერთ-ერთი მგზავრის ინფორმაციით, რომელიც ტელეკომპანია პირველის მიერ გავრცელებულ ვიდეოში საუბრობს, გარდაცვლილს სამედიცინო დახმარება დროულად არ აღმოუჩინეს.