პრემიერმინისტრმა, გიორგი კვირიკაშვილმა დღეს გამართულ მთავრობის სხდომაზე განაცხადა, რომ წელს სახელმწიფო რთველი 2016-ის სუბსიდირებას მოახდენს. პრემიერმა იმედი გამოთქვა, რომ სახელმწიფოს ხელშეწყობით, მევენახე გლეხებსა და ფერმერებს ჩაუბარებელი ყურძენი აღარ დარჩებათ:

"დიდი მსჯელობის შედეგად მივიღეთ ყურძნის სუბსიდირების გადაწყვეტილება. ჩვენ მივდივართ ორი მიმართულებით: ადგილობრივი მეღვინეობის განვითარება, ადგილობრივი წარმოების განვითარება და ახალი პოტენციალის შექმნა. მეორე, ბაზრების განვითარება, სადაც არანაკლები რესურსი იხარჯება, რაც ძალიან მნიშვნელოვანია. წელს მიღებული გადაწყვეტილების თანახმად, მოხდება სხვადასხვა განფასებით, სხვადასხვა ჯიშების სუბსიდირება. დიდი იმედი გვაქვს, რომ ყურძენი ჩაუბარებელი არ დარჩება".

მისი განმარტებით, მთავრობის ოპონენტები შეიძლება სპეკულირებდნენ, რომ აღნიშნული თანხა დაიხარჯება სხვა მიმართულებით, თუმცა მან განაცხადა, რომ რესურსი დაიხაჯრება ორივე მიმართულებით:

"რა თქმა უნდა, გარდამავალ პერიოდში, სანამ მოვიპოვებთ იმდენ ბაზარს, რამდენიც საჭირო იქნება ადგილობრივი ყურძნის რეალიზაციისთვის, დაგვჭირდება საექსპორტო ბაზრების განვითარების დაფინანსება, საქართველოს ექსპორტის ექსპანსიის დაფინანსება და მეორე, ადგილობრივი წარმოების სუბსიდირება, რათა ეს გარდამავალი ეტაპი გადავლახოთ და საბოლოო ჯამში, რა თქმა უნდა, უნდა გავთავისუფლდეთ სუბსიდიისგან".