პარლამენტის თავჯდომარე, დავით უსუფაშვილი ამბობს, რომ მას მერე, რაც რესპუბლიკელი მინისტრები თანამდებობებს დატოვებენ, პრემიერმინისტრის თავსატეხი იქნება, სად მოძებნის ისეთ კარგ მინისტრებს, როგორებიც თინა ხიდაშელი და პაატა ზაქარეიშვილი არიან:

"პრემიერმინისტრის თავსატეხია, როგორ და სად მოძებნოს ასეთი ძალიან კარგი მინისტრების, ძალიან კარგი შემცვლელები და მე მას წარმატებას ვუსურვებ ამაში იმიტომ, რომ ჩვენ ძალიან კარგი მინისტრები გვჭირდება, მას მერეც რაც რესპუბლიკელები დატოვებენ თანამდებობებს. რესპუბლიკელი თავდაცვის მინისტრი იყო ძალიან კარგი თავდაცვის მინისტრი და მე დარწმუნებული ვარ, პრემიერმინისტრი ამ თანამდებობაზე ისეთ ადამიანს დანიშნავს, რომელიც გააგრძელებს ამ სფეროში ძალიან წარმატებულ რეფორმებს".

დღეს რესპუბლიკელების მიერ გამართულ ბრიფინგზე ცნობილი გახდა, რომ თავდაცვის მინისტრი, თინა ხიდაშელი და შერიგების საკითხებში სახელმწიფო მინისტრი, პაატა ზაქარეიშვილი თანამდებობებს ტოვებენ. როგორც მოგვიანებით ზაქარეიშვილმა განაცხადა, ქართული ოცნება არ დასთანხმდა რესპუბლიკელების შეთავაზებას მინისტრთა კაბინეტში რესპუბლიკელი მინისტრების დარჩენასთან დაკავშირებით.