თინათინ ხიდაშელი თავდაცვის მინისტრის პოსტს აშშ-ში ვიზიტის შემდეგ დატოვებს. ამის შესახებ მან ჟურნალისტებთან ისაუბრა:

"თავდაცვის სამინისტროში არის რამდენიმე ძალიან სასწრაფოდ დასასრულებელი ღონისძიება, რომელსაც გადაბარების რეჟიმი ხელს შეუშლის და პრობლემას შექმნის. მათ შორის ერთ-ერთი თბილისში გაფორმებული მემორანდუმის ფარგლებში დაგეგმილი იყო ამერიკაში ამ მემორანდუმის გეგმაზე მუშაობა. ამიტომ, მე ამერიკაში გავემგზავრები, ამ პროცესს დავასრულებ და იქიდან დაბრუნების შემდეგ კონკრეტულ რიცხვზე შევთანხმდებით".

ხიდაშელის თქმით, იგი პრემიერს გუშინ, 11 ივლისს შეხვდა და კონკრეტულ თარიღებზე შეუთანხმდა:

"აქამდე როგორც მოვედით, ზუსტად ასევე ცივილიზებულად უნდა დავასრულოთ ეს პროცესი".

უსუფაშვილი - რესპუბლიკელები - ამ სახელწოდებით პარტია დღეიდან საარჩევნო კამპანიას იწყებს. სიის პირველი ნომერი პარლამენტის მოქმედი თავმჯდომარე დავით უსუფაშვილი იქნება.

დღესვე ცნობილი გახდა, რომ არჩევნებში მონაწილეობის გამო მინისტრის პოსტებს ტოვებენ თინა ხიდაშელი და პაატა ზაქარეიშვილი.