გერმანიის საგარეო საქმეთა მინისტრი, ჰეიკო მასი აცხადებს, რომ რუსეთთან ნდობის ამოწურვის მიუხედავად, მასთან თანამშრომლობა მრავალი კუთხით უმნიშვნელოვანესია. ინფორმაციას ამის შესახებ Reuters ავრცელებს.

"ბოლო წლების განმავლობაში, საერთაშორისო არენაზე რუსეთის ქმედებებიდან გამომდინარე, დასავლეთის სახელმწიფოები რუსეთს აღარ ენდობიან. ამავდროულად, ჩვენ გვჭირდება რუსეთი როგორც საერთაშორისო პარტნიორი, რეგიონული კონფლიქტების გადასაჭრელად", - აცხადებს ჰეიკო მასი.

საგარეო საქმეთა მინისტრის განცხადებით, რუსეთის მზაობის შემთხვევაში, გერმანია ნაბიჯ-ნაბიჯ იმუშავებს ნდობის აღსადგენად. მასმა ინტერვიუში, ასევე, ისაუბრა დიპლომატების გაძევების საკითხზე. მისი თქმით, დიპლომატების გაძევება სწორი გადაწყვეტილება იყო, რადგან ამ თემაზე ბრიტანეთის მიმართ ყველა ევროპული სახელმწიფო სოლიდარული უნდა იყოს.

წინა კვირაში სკრიპალის საქმესთან დაკავშირებით, 26-მა სახელმწიფომ საკუთარი ქვეყნებიდან 150-მდე რუსი დიპლომატი გააძევა, მათ შორის გერმანიამაც. გერმანიამ ქვეყნიდან 4 რუსი დიპლომატის გაძევების გადაწყვეტილება მიიღო. ბერლინის გადაწყვეტილებას მოსკოვმა სარკისებურად უპასუხა და შესაბამისად, ქვეყნიდან 4 გერმანელი დიპლომატი გააძევა.

გერმანიის მმართველ, ე.წ. "დიდ კოალიციაში" შემავალი სოციალ-დემოკრატიული პარტიის წევრებმა წინა კვირას კანცლერს, ანგელა მერკელს მიმართეს მოთხოვნით, რომ გამოსულიყვნენ გარანტად, რომ არ დაწყებულიყო ახალი ცივი ომი დასავლეთსა და რუსეთს შორის.

გერმანიის მთლიანი გაზის მოხმარების დაახლოებით მესამედი რუსულ გაზზე მოდის. შესაბამისად, ბერლინში მოსკოვთან კავშირებს განსაკუთრებით უფრთხილდებიან. 2014 წელს გერმანიიდან რუსეთში ექსპორტირებული პროდუქციის ჯამური ღირებულება 38 მილიარდი ევრო იყო.