პარტია ევროპული საქართველო ინფრასტრუქტურის უკვე ყოფილ მინისტრს, ზურაბ ალავიძეს კორუფციაში ადანაშაულებს. პარტიის წევრმა, ირაკლი კიკნაველიძემ დღეს, 30 მარტს სახელმწიფო უსაფრთხოების სამსახურში მასალები წარადგინა, რომელიც გზების დეპარტამენტში გამოვლენილ სავარაუდო კორუფციულ სქემებს შეეხება.

მისი განცხადებით, მინისტრმა ალავიძემ მხოლოდ თანამდებობის დატოვებით არ უნდა აგოს პასუხი და ამ საქმით გამოძიება აუცილებლად უნდა დაინტერესდეს:

"ადამიანების ერთი ჯგუფი, რომლის ხელმძღვანელიც ზურაბ ალავიძე იყო ერთი ხელით გასცემდა ტენდერებს კომპანიებზე, რომელსაც გზები უნდა დაეგო, მეორე ხელით კი იმ კომპანიებზე, რომლებსაც ხარისხი უნდა შეემოწმებინათ და შემდეგ, აი, ამ კორუფციული სქემის წარმომადგენლები თავად დასაქმდნენ როგორც დამგეგმავ, ისე შემმოწმებელ კომპანიებში".

სამთავრობო ცვლილების შესახებ პრემიერმა კვირიკაშვილმა დღევანდელ ბრიფინგზე განაცხადა. რეგიონალური განვითარების მინისტრს, ზურაბ ალავიძეს თანამდებობაზე მთავრობის კანცელარიის ადმინისტრაციის უფროსი, მაია ცქიტიშვილი შეცვლის.

პრემიერი ბრალდებებს დღევანდელ ბრიფინგზევე გამოეხმაურა. მისი თქმით, პოლიტიკურ სპეკულაციებს საფუძველი არ აქვს:

"მოგეხსენებათ, რომ ინფრასტრუქტურის სამინისტრო ატარებს სხვადასხვა ტენდერს და არაერთი კომპანია მონაწილეობს ამ ტენდერებში. ბუნებრივია, რომ კერძო სექტორის ყველა სუბიექტი ვერ იქნება ერთნაირად ბედნიერი და კმაყოფილი. ისინი სხვადასხვა პოლიტიკური საშუალებებით, მათ შორის, ჩვენ ვნახეთ ე.წ. ოპოზიციონერები, რომლებიც კონკრეტულ კომპანიებს ლობირებდნენ, გუშინ იყვნენ აყოლილნი ამ მითქმა-მოთქმას".

საპარლამენტო უმრავლესობის წევრი ეკა ბესელია ამბობს, რომ ინფრასტრუქტურის სამინისტრო ერთ-ერთია იმ უწყებებიდან, რომელიც მასშტაბურ პროექტებს ახორციელებს და შესაბამისი ბიუჯეტიც აქვს: "აქედან გამომდინარე, ყოველთვის მოიძებნება ვიღაც, ვინც შეიძლება იყოს უკმაყოფილო".