საქართველოს სახალხო დამცველი კრიტიკულად აფასებს თბილისის მუნიციპალიტეტის საკრებულოში ქართული ოცნების დეპუტატის, ვახტანგ შაქარიშვილის რეპლიკას - "რა არის ეს? ბოზი ქალებივით ყვირიხართ", - რომლითაც მან საჯარო განხილვაში მონაწილე პირებს მიმართა.

სახალხო დამცველი მიიჩნევს, რომ აღნიშნული გამონათქვამი სექსისტური შინაარსისაა და ქალთა კონკრეტულ მდგომარეობას დამამცირებელ კონტექსტში მოიაზრებს.

სახალხო დამცველი მოუწოდებს ვახტანგ შაქარიშვილს, მომავალში თავი შეიკავოს სექსისტური შინაარსის გამონათქვამებისგან და მისი საქმიანობის განხორციელებისას დაიცვას თანასწორობის პრინციპი.

სახალხო დამცველის განცხადებით, პოლიტიკურ პროცესებში მონაწილე პირებს გაცნობიერებული უნდა ჰქონდეთ, რომ განსაკუთრებული პასუხისმგებლობა აკისრიათ, ხელი შეუწყონ თანასწორობის პრინციპის დაცვას.

"მათი მხრიდან გამოთქმული სექსისტური თუ სხვა სახის დისკრიმინაციული შინაარსის შემცველი გამონათქვამების გამოყენებას, შესაძლოა, დამანგრეველი ეფექტი ჰქონდეს ქვეყანაში თანასწორობისთვის ბრძოლის პროცესზე", - ნათქვამია ომბუდსმენის განცხადებაში.

სახალხო დამცველის განცხადებით, საქართველოში ქალთა თანასწორუფლებიანობა და ქალთა თანაბარი მონაწილეობა გადაწყვეტილების მიღების პროცესში ერთ-ერთ გამოწვევად რჩება.

სახალხო დამცველი მიიჩნევს, რომ პოლიტიკურ პროცესებში ჩართულ პირთა მიერ სექსისტური და დისკრიმინაციული ხასიათის გამონათქვამები აკნინებს გადაწყვეტილების მიღების პროცესში ქალთა მონაწილეობის მნიშვნელობას და ხელს უშლის გენდერული თანასწორობის მიღწევას.

თბილისის გენერალურ გეგმასთან დაკავშირებულ საჯარო განხილვაზე ქართული ოცნებისა და ოპოზიციის წარმომადგენლებს შორის სიტუაცია მას შემდეგ დაიძაბა, რაც კახი კალაძემ ელენე ხოშტარიას საუბარი შეაწყვეტინა.