ჩინეთმა დაადასტურა, რომ ჩრდილოეთ კორეის ლიდერი კიმ ჩენ ინი პეკინს ეწვია, სადაც პრეზიდენტ სი ძინპინს შეხვდა. The Guardian-ის ინფორმაციით, კიმ ჩენ ინმა კორეის ნახევარკუნძულის ბირთვული იარაღისგან გათავისუფლების პირობა დადო.

ადგილობრივი მედიის ცნობით, კიმ ჩენ ინის ვიზიტი 25 მარტს დაიწყო და 28 მარტს დასრულდა. კიმ ჩენ ინის შეფასებით, ნახევარკუნძულზე მდგომარეობა უკეთესობისკენ მიდის.

ფხენიანის ლიდერის განმარტებით, ჩრდილოეთ კორეა მზადაა დენუკლეარიზაციისთვის, თუ სამხრეთ კორეა და აშშ "ამ ნებას სათანადოდ უპასუხებენ და მშვიდობისა და სტაბილურობის ატმოსფეროს შექმნიან".

ჩინეთში კიმ ჩენ ინის მოულოდნელი ვიზიტის შესახებ მედია ჯერ კიდევ ორშაბათს, 26 მარტს წერდა. 2011 წლის შემდეგ მისთვის ეს პირველი გასვლაა საზღვარგარეთ. ჩინური და იაპონური გამოცემები წერენ, რომ ფხენიანის ლიდერმა ჩინეთის საზღვარი მატარებლით გადალახა.

ბირთვული იარაღის გამოცდისა და სანქციების შემდეგ ჩრდილოეთ კორეამ გარე სამყაროსთან "დაახლოება" დაიწყო. ზამთრის ოლიმპიადაზე, რომელიც სამხრეთ კორეაში ჩატარდა, ნახევარკუნძული საერთო დროშის ქვეშ ასპარეზობდა. ოლიმპიადას ჩრდილოეთ კორეა ოფიციალური დელეგაციით ეწვია, რომელსაც კიმ ჩენ ინის და ხელმძღვანელობდა.

მარტის დასაწყისში ცნობილი გახდა, რომ ჩრდილოეთ კორეა ბირთვულ იარაღზე უარის თქმისთვის მზადაა. ასევე, აპრილში, სავარაუდოდ, კიმ ჩენ ინი სამხრეთ კორეის პრეზიდენტ შეხვდება.

ბევრს საუბრობენ კიმ ჩენ ინისა და აშშ-ის პრეზიდენტის, დონალდ ტრამპის სამომავლო შეხვედრაზე, რომელსაც დონალდ ტრამპი უკვე დათანხმდა.