შს მინისტრის მოადგილემ, ნინო ჯავახაძემ განაცხადა, რომ ევროპის ქვეყნებში თავშესაფრის მაძიებელი საქართველოს მოქალაქეების მოთხოვნებს, ძირითადად მკურნალობის ან ოჯახის გამთლიანების მოტივით აკმაყოფილებენ.

შს მინისტრის მოადგილემ თავშესაფრის მინიჭების მოტივებზე დღეს, 27 თებერვალს ევროინტეგრაციის კომიტეტის გაერთიანებულ სხდომაზე მას შემდეგ ისაუბრა, რაც ერთიანი ნაციონალური მოძრაობის წევრმა, სალომე სამადაშვილმა კითხვა დაუსვა. სამადაშვილს აინტერესებდა რა მიზეზით ითხოვენ საქართველოს მოქალაქეები საზღვარგარეთ თავშესაფარს. მინისტრის მოადგილის თქმით, მათ მსგავსი ინფორმაცია არ აქვთ:

"იმ მწირი რაოდენობის დადებით პასუხებს შორის, [თავშესაფრის მიღების] ძირითადი მოტივია ოჯახის გამთლიანება და ასევე, პირადი საფრთხე, რაც ჯანმრთელობის პრობლემასთანაა დაკავშირებული, ანუ თუკი მოქალაქე დაბრუნდება ქვეყანაში, ის ვერ მიიღებს სათანადო სამედიცინო დახმარებას. ამაზე ჩვენ მივაწოდეთ ინფორმაცია არსებულ ჯანდაცვის სისტემაზე და თუ რა პროგრამებს სთავაზობს სახელმწიფო მოქალაქეებს, მათ შორის მძიმე დაავადებების მკურნალობისას".

ნინო ჯავახაძის თქმით, მათი პროგნოზით, შემოდგომისთვის თავშესაფრის მაძიებელთა რაოდენობის ტენდენცია და მონაცემები კლებისკენ უნდა შეიცვალოს.

ევროკავშირთან უვიზო მიმოსვლის ამოქმედებიდან ერთი წლის თავზე პარლამენტში, კომიტეტის სხდომაზე არსებულ გამოწვევებზეც ისაუბრეს.