ბიზნესკონტაქტისა და საქმიანი დილის გუნდი, რომელსაც 2016 წლის მაისის ბოლომდე გიორგი ისაკაძის ხელმძღვანელობით ეკონომიკური თემატიკის გადაცემებს ტელეკომპანია მაესტროსთვის ამზადებდა, დღეიდან ტელეკომპანია პირველისთვის იმუშავებს.

აღნიშნული გუნდი ტელეკომპანია პირველისთვის ორ გადაცემას - "საქმიან დილასა" და "ბიზნესკონტრაქტს" მოამზადებს. ტელეკომპანია პირველზე ისინი 4 საეთერო საათს დაიკავებენ. "საქმიანი დილა" დილის 9:00-დან 11:30 საათამდე გაგრძელდება, "ბიზნესკონტრაქტი" კი დღეში ორჯერ, 15:00 და 18:30 საათზე გავა. "ბიზნესკონტრაქტი" მაესტროს ეთერში "ბიზნესკონტაქტის" სახელით გადიოდა.

ახალი ეთერის დაწყება მაყურებელს გიორგი ისაკაძემ ამცნო: "ჩვენ დავბრუნდით იმისთვის, რომ საქმიანი დილა გისურვოთ. მე ბედნიერი ვარ, რომ ამ გუნდთან ერთად ვაგრძელებ საქმიან დილას და მას ყოველ პარასკევ დილით შემოვუერთდები".

საქმიანი დილის წამყვანები უცვლელი შემადგენლობით წარდგნენ მაყურებლის წინაშე.

გიორგი ისაკაძე და ამ გადაცემებზე მომუშავე 30-ზე მეტი თანამშრომელი მაესტროს გენერალურმა დირექტორმა ზურაბ ნაყეურმა 2 ივნისს გაათავისუფლა. თავდაპირველად მან სამსახურიდან გიორგი ისაკაძე დაითხოვა, შემდეგ კი ის თანამშრომლები, რომლებიც ტელეკომპანია რუსთავი 2-ის ეთერში მაესტროს საკითხზე მომზადებულ გადაცემაში მონაწილეობდნენ, საბოლოოდ კი, არხიდან მთელი გუნდი გაუშვეს, რაც ნაყეურმა საზოგადოებას ამ განცხადებით ამცნო: "ვინაიდან მაესტროს ღია ეთერით გაკეთდა განცხადება, სადაც გადაცემების წამყვანებმა მთლიანად შემოქმედებითი ჯგუფის სახელით მიმართეს მაესტროს დირექციას ულტიმატუმით, სადაც ისინი მოითხოვდნენ ყოფილი თანამშრომლის გიორგი ისაკაძის სამსახურში აღდგენას, ხოლო წინააღმდეგ შემთხვევაში იტოვებდნენ უფლებას მთელი გუნდით ტელევიზიის დატოვებისას; ასევე ვინაიდან გაკეთდა სტუდია მაესტროს დირექტორის განცხადება სადაც ის უარით პასუხობს გიორგი ისაკაძის შეთავაზებას და ვინაიდან ამ დრომდე გაურკვეველი რჩება ამ გუნდის წევრების პოზიცია სტუდია მაესტროსთან შრომითი უფლებების გაგრძელების შესახებ ვბრძანებ: საქმის ვითარების სრულ გარკვევამდე დროებით შეუწყდეთ შრომითი ხელშეკრულება 2016 წლის 2 ივნისიდან თანამშრომლებს".

მაესტროდან 30-ზე მეტი თანამშრომლის მოულოდნელად გაშვებას უარყოფითი რეაქციები მოჰყვა არასამთავრობო ორგანიზაციების მხრიდან.