ბიზნესკონტაქტისა და საქმიანი დილის 27 ყოფილ თანამშრომელს მაესტროს წინააღმდეგ სარჩელი სასამართლოში შეაქვს. ისინი მიიჩნევენ, რომ მაესტროს დირექტორმა მათ უფლებამოსილება უკანონოდ შეუჩერა და მაესტროსგან მაისის ხელფასების ანაზღაურებასა და კომპენსაციას ითხოვენ.

მაესტროს ერთი-ერთი ყოფილი თანამშრომლის, ელენე ჩომახიძის განმარტებით, აღნიშნული 27 ადამიანი მაქსიმალურად შეეცადა სასამართლოს გვერდის ავლით მოეგვარებინა არსებული პრობლემა, თუმცა უშედეგოდ:

"ჩვენ ძალიან ბევრ კომპრომისზე წავედით და ძალიან ბევრი რამ დავთმეთ. მოხდა კიდეც ჩვენს იურისტსა და ტელეკომპანია მაესტროს დირექტორს შორის შეთანხმება, თუმცა შემდეგ, ისევ და ისევ შევეჩეხეთ მაესტროს ხელმძღვანელობისგან არათანმიმდევრულ ნაბიჯებს".

ბრალდებებს პასუხობს ტელეკომპანია მაესტროს საზოგადოებასთან ურთიერთობის სამსახურის წარმომდგენელი, მერი კარტოზია და ამბობს, რომ მაესტროს აღნიშნულმა ყოფილმა თანამშრომლებმა არხიდან წასვლა თავად გადაწყვიტეს:

"მე ახლა ხელში მიჭირავს მათი კოლექტიური განცხადება წასვლაზე. მათვე გადაწყვიტეს, რომ ამას პროვოკაციული ფორმა მისცემოდა. თუმცა, ფაქტია, რომ მაესტროს ამ გადაწყვეტილებით სერიოზული ფინანსური ზიანი მიადგა".

მან განმარტა, რომ ვინაიდან ორ მხარეს აქვს შემხვედრი ფინანსური პრეტენზიები არსებობს, საქმის არსობრივ გარკვევამდე, მაესტრო უარს ამბობს ჟურნალისტების მოთხოვნების დაკმაყოფილებაზე.

2 ივნისს ბიზნესკონტაქტისა და საქმიანი დილის თანამშრომლებს უფლებამოსილება შეუჩერდათ. არხის დირექტორმა განმარტა, რომ ეს გადაწყვეტილება მას შემდეგ მიიღო, რაც აღნიშნულმა თანამშრომლებმა მას ულტიმატუმი წაუყენეს, რომ ამავე გადაცემების ავტორი და წამყვანი, გიორგი ისაკაძე სამსახურში აღედგინა, წინააღმდეგ შემთხვევაში იტოვებდნენ უფლებას მთელი გუნდით ტელევიზიის დატოვებისას.

30 მაისს მაესტროს წამყვანი, გიორგი ისაკაძე თანამდებობიდან გაათავისუფლეს. ამის შესახებ გადაწყვეტილება ტელეკომპანიის დირექტორმა, ზურაბ ნაყეურმა მიიღო და განმარტა, რომ გათავისფულების მიზეზი ისაკაძის საავტორო გადაცემების ე.წ. აუთსორსზე გასვლის მოთხოვნამ განაპირობა.