სახალხო დამცველმა ნინო ლომჯარიამ ახალგორელი სამოქალაქო აქტივისტის, თამარ მეარაყიშვილის საქმეზე თქვა, რომ ეს არის ერთ-ერთი გახმაურებული შემთხვევაა და არსებობს სხვა მსგავსი ფაქტები. ამის შესახებ ომბუდსმენმა ტვ პირველზე, ლევან ჩხაიძის დღის ამბებში ისაუბრა:

"ყოველდღიური საფრთხის ქვეშ არიან ჩვენი თანამოქალაქეები ოკუპირებულ ტერიტორიაზე. მე ვესაუბრე თამარს. გამომდინარე იქედან, რომ ნამდვილად არ ვთვლი, რომ ის უსაფრთხოდ იმყოფება, თავს შევიკავებდი ინფორმაციის გავრცელებისაგან მიმდინარე პროცესების შესახებ".

ომბუდსმენის ინფორმაციით, თამარ მეარაყიშვილი ელოდება დე ფაქტო პროკურატურისგან საბოლოო განჩინების ჩაბარებას, მის ბრალთან დაკავშირებით და შემდეგ თავად მიიღებს გადაწყვეტილებას, თუ როგორ იბრძოლებს საკუთარი უფლებების დასაცავად.

თამარ მეარაყიშვილის მიმართ სამხრეთ ოსეთის დე ფაქტო რესპუბლიკის პროკურატურამ რიგით მეორე სისხლის სამართლის საქმე აღძრა. ნეტგაზეთის ინფორმაციით, ამ ეტაპზე ცნობილია მხოლოდ ის, რომ საქმე აღიძრა მუხლით, რომელიც ოფიციალური დოკუმენტების, ჯილდოების, ბეჭდის, შტამპის, ბლანკის გაყალბებას ითვალისწინებს.

მეარაყიშვილი 2017 წლის 16 აგვისტოს დააკავეს დე ფაქტო სამხრეთ ოსეთის მმართველი პოლიტიკური პარტიის ედინაია ოსეტიას მიმართ ცილისწამების ბრალდებით. მას შემდეგ ოთხი სასამართლო პროცესი ჩატარდა ცხინვალში, ბრალდებულის სახლი არაერთგზის გაიჩხრიკა, არაერთი დაკითხვა ჩატარდა, თუმცა გამოძიებამ მაინც ვერ შეძლო საკმარისი მტკიცებულების მოპოვება იმის დასამტკიცებლად, რომ მეარაყიშვილი დამნაშავეა.

თამარს ყველანაირი დოკუმენტი აქვს ჩამორთმეული და გადაადგილების უფლება - შეზღუდული.