"თუ ვინმემ ჩემი განცხადებების გამო შეურაცხყოფილად იგრძნო თავი, და ეს პირველად არ მომხდარა, ეს არ ნიშნავს იმას, რომ მე ვინმეს შეურაცხყოფა მივაყენე. ამიტომ ვთვლი რომ არავისთან საბოდიშო არაფერი არ მაქვს", - რუსთავი 2-ის ჟურნალისტმა გიორგი გაბუნიამ დღეს გადაცემა არჩევანის ანონსისას განაცხადა, რომ ქრისტეზე განცხადების გამო ის ბოდიშის მოხდას არ აპირებს:

"შესაძლებელია ჩემი, როგორც ასეთის არსებობაც შეურაცხმყოფელია, ბოდიში ხომ არ მოვიხადო იმისთვისაც რომ ვარსებობ? მე ამას არ გავაკეთებ".

გუშინ, 19 მარტს, რუსთავი 2-ის ოფისის ეზოში შენობასთან შეკრებილმა ნეო-ნაცისტური დაჯგუფების, ქართული მარშის წევრებმა, ალყა შემოარტყეს ავტომობილს, რომელშიც ჟურნალისტი გიორგი გაბუნია და არხის იურისტი თამთა მურადაშვილი იმყოფებოდნენ. მათ სიტყვიერი შეურაცხყოფა მიაყენეს გიორგი გაბუნიას და შენობაში შესვლის შესაძლებლობა არ მისცეს.

ნეო-ნაცისტური ქართული მარშის ერთ-ერთ დამფუძნებელს, სანდრო ბრეგაძეს მიაჩნია, რომ გიორგი გაბუნიამ მათ "რელიგიურ გრძნობებს" შეურაცხყოფა მიაყენა, როცა 18 მარტს გადაცემა P.S.-ში იესო ქრისტეს ჯვარცმაზე ისაუბრა. მისივე თქმით, თუ გაბუანია არ მოიხდის ბოდიშს ეს "მისთვის ცუდი იქნება".

მოგვიანებით არხის გენერალურმა დირექტორმა, ნიკა გვარამიამ განაცხადა, რომ რელიგიური გრძნობების შელახვის გამო ჟურნალისტმა გიორგი გაბუნიამ საყვედური მიიღო. მისი თქმით, 18 მარტს გადაცემა კურიერი P.S.-ში, იესო ქრისტეზე გიორგი გაბუნიას მიერ გამოთქმული მოსაზრებებით, მორწმუნეების რელიგიური გრძნობები შეილახა. დარღვევა არხის ეთიკის კომისიამ დაადგინა. გვარამია ამბობს, რომ მსგავსი ქმედებებისგან ჟურნალისტმა თავი უნდა შეიკავოს.

ჟურნალისტური ეთიკის ქარტია მიმართავს შინაგან საქმეთა სამინისტროს და პროკურატურას, დროულად გამოიძიონ ტელეკომპანია რუსთავი 2-ის ჟურნალისტებზე 19 მარტს მომხდარი თავდასხმის ფაქტი.

ჟურნალისტური ეთიკის ქარტიის პოზიციით, ჟურნალისტურ სტანდარტებზე სამსჯელოდ არსებობს თვითრეგულირების მექანიზმები, მათ შორის საქართველოს ჟურნალისტური ეთიკის ქარტია და ეს პლატფორმებია ყველაზე ეფექტური ჟურნალისტის პროფესიული და ეთიკური გადაწყვეტილებების შესაფასებლად.

ტელეკომპანია რუსთავი 2-ის შენობასთან ქართული მარშის 6 წევრი დააკავეს. მარშის წევრებმა ტელეკომპანიის თანაშრომლებს სიტყვიერი და ფიზიკური შეურაცყოფა მიაყენეს.

შინაგან საქმეთა სამინისტრო დაკავებულებს სამართალდამცავისადმი დაუმორჩილებლობასა და წვრილმან ხულიგნობას ედავება.