შინაგან საქმეთა მინისტრის პირველი მოადგილის კახა საბანაძის თქმით, ტატუნაშვილის საქმეზე გამოძიება მიმდინარეობს და ქართული მხარე ყველაფერს გააკეთებს, რათა მკვლელები დაისაჯონ კანონის სრული სიმკაცრით. ამის შესახებ მინისტრის მაოდგილემ იმედის ეთერში, გადაცემაში პირისპირ ისაუბრა.

მინისტრის მოადგილის ინფორმაციით, დე ფაქტო სამხრეთ ოსეთის მხარემ მათ ასევე გადასცა არჩილ ტატუნაშვილის კუთვნილი ავტომანქანაც, რასაც ასევე ექსპერტიზა უტარდება, მოგვიანებით კი ოჯახს დაუბრუნებენ.

ექსპერტიზა უტარდება არჩილ ტატუნაშვილის ცხედარს ლევან სამხარაულის სახელობის სასამართლო ექსპერტიზის ეროვნულ ბიუროში. კახა საბანაძის თქმით, გარდაცვლილს წილკანში უახლოეს საათებში გადაასვენებენ, მას შემდეგ რაც საჭირო საგამოძიებო მოქმედებები დასრულდება.

არჩილ ტატუნაშვილის ცხედარი საქართველოს ხელისუფლებას დღეს საღამოს, 20 მარტს ერგნეთში, წითელი ჯვრის მისიის დახმარებით გადასცეს.

ოჯახი უკვე 26 დღეა ელოდება არჩილ ტატუნაშვილის ცხედარს დე ფაქტო ხელისუფლებისგან.