შინაგან საქმეთა სამინისტროს თანამშრომლებმა, ბელარუსის რესპუბლიკის მიერ დეპორტირებული ე.წ. კანონიერი ქურდი თბილისის საერთაშორისო აეროპორტში იმ დროს დააკავეს, როდესაც ბელარუსის რესპუბლიკიდან საქართველოში ჩამოფრინდა.

დაკავებული 1973 წელს წარსულში ნასამართლევი პირია. გამოძიება კანონიერი ქურდობის ფაქტზე მიმდინარეობს. მის მიმართ წარდგენილი ბრალი 7-დან 10 წლამდე ვადით თავისუფლების აღკვეთას ითვალისწინებს.

შსს-ს ცნობით, ბრალდებული 1993 წლიდან ე.წ. ქურდულ სამყაროში აღიარებულია კანონიერ ქურდად.

"ბოლო წლების განმავლობაში რუსეთის ფედერაციაში იყო და ე.წ. ქურდულ გარჩევებში აქტიურად მონაწილეობდა", - ვკითხულობთ შსს-ს განცხადებაში.

შსს-მ მოამზადა საკანონმდებლო პაკეტი, რომლის განხილვა საქართველოს პარლამენტში მიმდინარეობს. კანონპროექტის მიხედვით, ქურდული სამყაროს საქმიანობის მხარდაჭერა, ქურდული შეკრების ორგანიზება, ქურდული სამყაროს წევრისთვის ან კანონიერი ქურდისთვის მიმართვა დანაშაულად ცხადდება, ქურდული სამყაროს წევრობისა და კანონიერი ქურდობისთვის სასჯელი კი მკაცრდება.