BBC-ის ცნობით, საფრანგეთის, გერმანიის, ამერიკის შეერთებული შტატებისა და დიდი ბრიტანეთის ლიდერები ერთობლივ განცხადებას ავრცელებენ და აცხადებენ, რომ რუსეთის პასუხისმგებლობა მხოლოდ "დამაჯერებელი ახსნა-განმარტება" იყო.

ლიდერები გმობენ იმ ფაქტს, რომ ევროპაში პირველად გამოიყენეს ნერვო-პარალეპტიკური გაზი მეორე მსოფლიო ომის შემდეგ. ისინი ამას დიდი ბრიტანეთის სუვერენიტეტზე თავდასხმად აფასებენ.

გუშინ, 14 მარტს პრემიერ მინისტრმა ტერეზა მეიმ განაცხადა, რომ დიდი ბრიტანეთი ყოფილი რუსი ჯაშუშისა და მისი შვილის მოწამვლის გამო, ქვეყნიდან 23 რუსს დიპომატს გააძევებს.

გადაწყვეტილება მას შემდეგ მიიღეს, რაც ოფიციალურმა მოსკოვმა უპასუხოდ დატოვა ლონდონის ულტიმატუმი.

სკრიპალისა და მისი შვილის მოწამვლა

რუსეთის სახელმწიფო უსაფრთხოების სამსახურის ყოფილი აგენტი სერგეი სკრიპალი და მისი შვილი, იულია 4 მარტს ქალაქ სოლსბერიში ნერვულ-პარალეპტიკური ნივთიერებით მოწამლეს. ბრიტანეთის ხელისუფლება ჯერჯერობით არ ასახელებს თუ კონკრეტულად რა ნივთიერებაზეა საუბარი. ამ ნივთიერების ნარჩენებს მიაკვლიეს რესტორან Zizi-ში და ერთ-ერთ პაბში, სადაც შემთხვევამდე რამდენიმე საათით ადრე სკრიპალი და მისი შვილი იმყოფებოდა.

სკრიპალი და მისი შვილი ამ დრომდე კრიტიკულად მძიმე მდგომარეობაში საავადმყოფოში რჩებიან. შედარებით მსუბუქია იმ პოლიციელის ჯანმრთელობის მდგომარეობა, რომელიც პირველად მიუახლოვდა სკრიპალს, თუმცა პოლიციელი უკვე გონზე მოვიდა.