აბასთუმანი ერთერთი ყველაზე სახელგანთქმული კურორტია საქართველოში. შეიძლება ითქვას, რომ არ არსებობს ადამიანი, რომელსაც არ სმენია აბასთუმნის ჰაერისა და იქაური ცის შესახებ, რომელსაც ცნობილი ობსერვატორიიდან აკვირდებიან.

აქაურობა დღემდე რჩება ერთერთ აქტიურ ტურისტულ დანიშნულებად.

ადგილობრივების თქმით, სეზონი მაისში იწყება და აგვისტოს ბოლომდე გრძელდება. ამ პერიოდში აბასთუმანს, ძირითადად, სომეხი და რუსი ტურისტები სტუმრობენ.

ინფრასტრუქტურა ნორმალური და მისაღებია, გზებს - არაუშავს, ელექტროენერგიისა და წყლის მიწოდების გრაფიკიც დალაგებულია.

აბასთუმანში დაახლოებით ათამდე სასტუმრო და კიდევ უფრო მეტი საოჯახო ტიპის სასტუმრო ემსახურება ტურისტებს.

სასტუმროების ფასები 60 ლარიდან იწყება, ხოლო საოჯახო ტიპის სასტუმროებში - 40 ლარიდან.

სასტუმრო აბასთუმანი

სასტუმრო აბასთუმანი

ფოტო: ლაზარე ლეკვეიშვილი

აქაურობა ჯანდაცვის ტურიზმითაცაა გამორჩეული. ათწლეულების განმავლობაში, აბასთუმანს, ჰაერის გამო, ფილტვებზე პრობლემების მქონე ან ტუბერკულოზით დაავადებული ადამიანები სტუმრობენ და მკურნალობენ.

ტუბდისპანსერი წლებია არ გარემონტებულა და შენობა მიტოვებულს უფრო ჰგავს, ვიდრე მოქმედს.

უკანა ეზოში ნაგავსაყრელია, ხოლო შენობაში ანტისანიტარიაა და ხშირად შეამჩნევთ წყალგაყვანილობის გაჟონვას.

აბასთუმანში ხშირად შეხვდებით მიტოვებულ და დანგრეულ შენობებს.

რომანოვების სახლი დაკეტილია, ტერიტორია ეკლიანი მავთულითაა შემოსაზღვრული. აქვეა დედათა მონასტერი.

ობსერვატორია სტუმრად მხოლოდ ჯგუფებს იღებს, თან გაფრთხილება რამდენიმე დღით ადრეა საჭირო.

საბაგირო აბასთუმნის პარკიდან ობსერვატორიამდე

საბაგირო აბასთუმნის პარკიდან ობსერვატორიამდე

ფოტო: ლაზარე ლეკვეიშვილი

აშკარაა, რომ ახლანდელი მდგომარეობისა და ტურისტული აქტიურობის გათვალისწინებით, აბასთუმანს ბევრად მეტი პოტენციალი აქვს და განვითარების შემთხვევაში შეუძლია ბევრად მეტი სტუმარი მოიზიდოს და სეზონიც უფრო ხანგრძლივი გახდეს. რაც თავისთავად განაპირობებს ადგილობრივი მოსახლეობის ფინანსურ კეთილდღეობას.