ქართული ოცნების წევრებმა და მათმა მხარდამჭერებმა, ბორჯომის საკრებულოს ოპოზიციონერი თავმჯდომარის, ზაზა ჩაჩანიძის წინააღმდეგ აქციას გამართეს. აქციის მონაწილეები საშტატო ნუსხის შემცირებასა და ხელფასების საკითხს აპროტესტებენ. მათი თქმით, მათ ბოლო ორი თვის განმავლობაში ხელფასი არ დარიცხვიათ.

აქციას ესწრებოდნენ პარტიის ადგილობრივი ლიდერები, მათ შორის ბორჯომის მერი ლევან ლიპარტია. ლიპარტიას თქმით, პრობლემების მოსაგვარებლად საკრებულოს ხელახალი სხდომა უნდა ჩაინიშნოს:

"ერთხელ და სამუდამოდ გაირკვეს ყველა ის საკითხი, რაზეც პრობლემები არსებობს"

ბორჯომის მერი ამბობს, რომ თანახმაა გაზრდილ ხელფასზე უარი თქვას, თუ საკრებულო სხვა თანამშრომლების საშტატო ნუსხას მხარს დაუჭერს. ამის შესახებ ლიპარტია On.ge-ს ესაუბრა.

მისი თქმით, ბორჯომის საკრებულომ მისი და მერიის სხვა თანამშრომლების ხელფასების გაზრდას მხარი დაუჭირა, თუმცა დოკუმენტს ხელს ამ დრომდე არ აწერენ.

28 თებერვალს ბორჯომის საკრებულოში ფიზიკური დაპირისპირება მოხდა. მერიის თანამშრომლები და საკრებულოს ფრაქცია ქართული ოცნების წევრები უმრავლესობაში მყოფ ოპოზიციური პარტიების წევრებს მას შემდეგ დაუპირისპირდნენ, რაც საშტატო ნუსხა საკრებულოს სხდომაზე არ დაამტკიცეს და არც ხელფასების ზრდას დაუჭირეს მხარი.

დილიდან ბორჯომის საკრებულოსთან პატრულია მობილიზებული. შენობაში არ უშვებდნენ საკრებულოს წევრებსა და თანამშრომლებს.

როგორც On.ge-ს შინაგან საქმეთა სამინისტროში უთხრეს, საკრებულოს შენობაში პატრულის თანამშრომლები გუშინდელი ინციდენტის შემდეგ რჩებიან. საკრებულოს მიმდებარე ტერიტორიაზე კი, შსს-ს განსაკუთრებულ დავალებათა დეპარტამენტის თანამშრომლები საზოგადოებრივი წესრიგის უზრუნველყოფის მიზნით იმყოფებიან.

საკრებულოში ჩხუბის საქმეზე შინაგან საქმეთა სამინისტრომ გამოძიება სსკ-ს 126-ე მუხლის 1-ლი პრიმა ნაწილის "ბ" ქვეპუნქტით და 126-ე მუხლის 1-ლი ნაწილით დაიწყო. რაც გულისხმობს ცემას ან სხვაგვარ ძალადობას, რამაც დაზარალებულის ფიზიკური ტკივილი გამოიწვია.